Специјалното јавно обвинителство со судски налог, вчера запленило документација од Министерството за култура за предмет поврзан со Скопје 2014, објави БИРН. Неофицијално, станува збор за документација за тендер вреден околу 1 милион евра за изградба на Музејот на македонската борба.
Овој музеј е еден од најголемите инвестиции на Владата на ВМРО – ДПМНЕ за проектот Скопје 2014. Според склучените договори изградбата на Музејот чини над 16 милиони евра, но, според бројот на склучени договори, тој е на првото место.
За изградбата на Музејот склучени се 123 договори со правни и со физички лица, меѓу кои има и голем број анекси, непредвидени и дополнителни работи и останати договори со физички лица кои од година во година ја зголемуваа цената. Целиот проект „Скопје 2014“, според базата на податоци на БИРН, досега достигна 667 милиони евра.
Музејот на ВМРО го градеше „Бетон – Штип“, една од фирмите кои заработија најмногу од проектот „Скопје 2014“. Базата на податоци „Скопје 2014 под лупа“, покажува дека Бетон – Штип добила тендери во вредност од над 54 милиони евра, само од проектот на власта.