Вицепремиерот за економски прашања Фатмир Битиќи денеска најави дека ако се утврди дека некои компании прават вештачки недостиг од пелети и огревно дрво само за да ја покачат цената и го зголемат профитот, во пресрет на грејната сезона, истите ќе ги објави јавно како што претходно беа објавени јавно, фабриките и маркетите кои лажно прикажуваа недостиг од некој ресурс или артикл со што и нереално им беше покачена цената. Битиќи рече дека денес ќе му било дадено задолжение на Инспекторатот да излезе на терен и да ја согледа фактичката состојба.
„Денеска на Влада по допрен глас ќе дадеме задолжение на Инспекторатот да излезе на терен за да потврди дека ваквите укажувања се вистинити. Укажувањето е дека трговците не дека немаат количини на пелети на огревни дрва, но тоа го прават вештачки, како што некој претходно се обиде пред одреден временски период тоа да го направи со прехранбените продукти за да има зголемување на нивните цени. Да имавме закон за воено профитерство лесно ќе реагиравме – изјави Битиќи на прашање на денешната прес-конференција во Владата поврзана со инвестициите за изградба и реконструкција на железничката и патната инфраструктура во Коридорите 8 и 10 Д.
Битиќи потсети дека во фаза на подготовка е закон за фер односи во стопанството, во кој, како што рече, тоа ќе биде регулирано. (М.Т.)