Советот на општина Битола со 15 гласа „за“ и 9 „против“, попладнево гласаше, на 15 октомври да се распише референдум на кој граѓаните од Битола ќе го искажат својот став околу нацрт стратегијата за мигранти.
Одлуката е изгласана по жестока расправа помеѓу советниците од СДСМ и ВМРО ДПМНЕ откако советниците од СДСМ предложија наместо референдум на кој ќе се потрошат околу 100.000 евра да се донесе одлука дека Советот на општина Битола е против населување и интеграција на бегалци на територијата на општина Битола, што беше одбиено.
Советниците имаа спротивставени мислења и околу датумот на одржување на референдумот, откако СДСМ предложи тоа да биде на 1 октомври.
За донесената одлука за референдум треба да се изјасни и Државната изборна комисија.
На денешната седница во Битола се појави и министерката за труд и социјална политика Мила Царовска која посочи дека се работи за манипулација и дека во Македонија нема да се населуваат бегалци, ниту да се градат станови.
-Ниту ќе се населуваат бегалци во Македонија, ниту ќе се градат станови за нив, рече Царовска, додавајќи дека ВМРО-ДПМНЕ шири ксенофобија и лажни вести.
-Нека кажат од ВМРО-ДПМНЕ со кој документ Владата се обврзала да потроши финансиски средства или направила проектни документи за изградба на станови, рече министерката за труд и социјална политика.
– Оваа Стратегија не се однесува на мигранти, напротив Резолуцијата што ја донесе Собранието на Република Македонија за мигранти ја изгласа мнозинството од ВМРО-ДПМНЕ. Македонија е држава која што ратификувала Конвенции за заштита на човекови права. Многу е важно да се потенцира дека референдумот е демократско право и ние веруваме во изјаснувањето на граѓаните за важни прашања на референдум, но ова прашање е лажно прашање, истакна Царовска.