Американскиот државен секретар Ентони Блинкен денеска пристигна во Саудиска Арабија, првата дестинација на неговата блискоисточна турнеја.
Блинкен се очекува во Ријад да се сретне со саудискиот престолонаследник и владетел на судското кралство Мохамед бин Салман, како и со саудискиот министер за надворешни работи, принцот Фајсал бин Фархан Ал Сауд.
Задачата на Блинкен е да се обиде да ги унапреди напорите на официјален Вашингтон да преговара за нормализација на односите меѓу Саудиска Арабија и Израел, како и да поттикне напредок во преговорите за управувањето со Појасот Газа по војната.
Петтата посета на американскиот државен секретар на овој регион доаѓа во чувствителен момент и во време на американски напади врз фракциите поддржани од Иран со седиште низ Сирија, Ирак и Јемен, како одговор на минатонеделниот напад со беспилотно летало во Јордан, во кој загинаа тројца и беа ранети десетици американски војници.
Блинкен оваа недела ќе ги посети Египет, Катар и Израел, продолжувајќи ја својата блискоисточна турнеја, во обид да поттикне напредок во разговорите со посредство на Египет и Катар за ослободување на заложниците од Појасот Газа.