Саша Богдановиќ нема да биде во игра за нов мандат во Општина Центар на претстојните локални избори од редовите на СДСМ. Владеачката партија „во центар“ ќе гаѓа со Горан Герасимовски, соопшти генералниот секретар на СДСМ, Љупчо Николовски кој во јавноста сподели уште дел од имињата на кандидати за градоначалници.
Поранешниот портпарол на СДСМ, а сега пратеник, Костадин Костадинов ќе биде фаворит на социјалдемократите „во битката“ за Струмица, бизнисменот Христо Кондовски ќе „трча“ во дресот на владеачката партија за Битола, додека Александар Наумовски ќе се бори за нов мандат во Ѓорче Петров.
Оливер Илиевски е понудата од СДСМ за електоратот во Куманово, со Асан Ферат ќе се атакува на градоначалничката фотелја во Шуто Оризари, со Никола Мисовски во Кривогаштани, со Димче Џипингароски во Струга, а со Сашко Поцков во Гевгелија.
Николовски на прес-конференцијата истакна дека, според партиските анализи и анкети, кандидатите на СДСМ ќе бидат сигурни победници во соочување со народот на 17 октомври.