„Неспоредливо е поголема веројаноста да има 80 пратеници за уставните измени, отколку 61 пратеник за распуштање на Собранието. Тоа е логично“ изјави потпретседателот на СДСМ, Стефан Богоев во „Утрински печат“.
Тој додаде дека е пологично пратеници да се одважат и ги поддржат уставните измени и со тоа го забрзаат евроинтегративниот пат на државата, отколку да гласаат против својата партија и коалиција за распуштање на Собранието.
„Она што го гледаме и слушаме од ВМРО-ДПМНЕ и Мицкоски е истата реторика, дека само што не направиле мнозинство, само што нема избори и само што Мицкоски не станал премиер. Тоа е реториката која тој и раководството ја користат внатре во партијата за да ги дисциплинираат градоначалниците кои добиваат поголема популарност од него“ рече Богоев.
Потпретседателот на СДСМ истакна дека ВМРО-ДПМНЕ и Левица работат според матрица на која им е во интерес земјава да биде меѓународно изолирана, за тие да царуваат.
„ВМРО-ДПМНЕ и Левица се иста матрица, најверојатно и со исти нарачатели и финансиери. Тие сакаат тука да не царуваат меѓународни закони, правила и вредности туку нивните – кога ќе станете сабајле да имате чувство на лажна гордост и патриотизам, а стомакот да ви е празен. Да мислите дека сите треба да трчаат кај вас, дека вие сте поголеми од нив. Груевски беше мајстор за тоа, а Мицкоски и Апасиев сакаат да се врати тоа време“ рече Богоев.
Р.Н.