Две непознати лица вчера по полноќ истуриле боја врз таблата на влезот во Хелсиншкиот Комитет за човекови права. Ова го регистрирале камерите поставени на објектот, а директорката Уранија Пировска го карактеризира како контрабоење, бидејќи Хелсиншкиот комитет ја поддржува Шарената револуција.
-Снимките од нашите камери покажуваат дека некаде околу 1 часот и 44 минути после полноќ се случил настанот. Ова е еден од низата настани кои имаат иста содржина и секако тоа се должи на нашето учество и поддршка на протестите, како некој вид контрабоење. Секако, не се води сметка дека тоа што го бои е Шарената револуција се институции кои се создадени да им служат на граѓаните, додека сите овие организации и објекти во приватна сопственост не може да влезат во таа категорија, особено што Хелсиншкиот комитет е куќата каде секој граѓанин може да дојде и да добие бесплатна правна помош, тоа е во манирот на сценаријата на власта, вели Пировска за НОВА.
Натсанот е пријавен во МВР, а од Комитетот ќе ги достават и снимките од камерите на објектот како доказ.
Хелсиншкиот комитет е дел од низата на објекти кои во изминативе две недели се мета на контрабоење. Минатата недела беше бојадисао логото на Фондацијата „Отворено општество“, Младинскиот образовен форум, а боја доби излогот на скопското кафуле Излет во центарот на Скопје, чиј што сопственик исто така учествува на протестите.
Граѓаните обединети под Шарената револуција преку протести со бојадисување на државни институции повеќе од еден месец бараат повлекување на одлуката за аболиција и оставка на претседателот Ѓорѓе Иванов, формирање на специјално одделение на Кривичниот суд за предметите на Специјалното јавно обвинителство, како и повлекување на одлуката за одржување на парламентарни избори на 5 јуни. Дел од барањата се и вклучување на граѓанското општество во решавање на кризата и формирање на преодна влада.