Студенти од повеќе организации денеска ја бојкотираа наставата на Правниот факултет „Јустинијан Први“ потенцирајќи дека не е во ред тие да седат на предавања додека нивните пријатели се на распит во полициските станици.
Нивната одлука за бојкот на наставата доаѓа два дена по одлуката на претседателот Ѓорѓе Иванов да ги аболицира сите политичари за прислушуваните разговори, и по масовните протести кои се одвиваа деновиве.
„Професоре нема да ви простиме“, „Фашист“, „Правен факултет кој ти е ставот“, се само дел од пораките испринтани низ целиот хол на факултетот.
Претходно тие имаа герила акција во кабинетот на професорката Татјана Каракамишева, која е цврст поддржувач на одлуката на Иванов.
– Од професорката Каракамишева побаравме да ја искоментира одлуката на Иванов, бидејќи предава Уставно право. Но, кога станува збор за ненарачани прашања, одговор не добивме. Побаравме да си даде оставка од морални причини, но претпоставуваме дека тоа нема да се случи, вели еден од студентите.
Напротив, Каракамишева им одговорила: „Сега ќе дојде полиција“.
А истиот одговор, професорката го упати и до НОВА, откако побаравме коментар пред нејзиниот кабинет, на вратата на која студентите запишаа „Фашист“.
Напротив професорката го извади својот мобилен телефон и снимаше со истото образложение дека тоа ќе го среди полицијата, иако и беше покажана и новинарска легитимација.
По бојкотот со разглас „Дојди и приклучи се“, кога студентите влегуваа од амфитеатар во амфитеатар порано во денот, потоа продолжија низ улиците на Скопје, каде повикаа на протести денеска во 18 часот.