Шпански весник „Марка“ активира „бомба“ што ја затресе фудбалска Европа. Објавен е првиот мега трансфер од финансиски аспект во зимскиот преоден рок. Со назнака „ексклузивно“ и со голема сигурност медиумот објави дека Лукас Ернандез во јануари ќе замине од Атлетико Мадрид и ќе потпише за Баерн Минхен.
Баварците решија да ја активираат откупната клаузула од неговиот договор со „јорганџиите“ што изнесува 85 милиони евра и да го направат најскап дефанзивец во историјата на фудбалската игра. Досегашниот рекорд го држеше Вирџил ван Дајк кој од Саутемптон се пресели во Ливерпул за 78,8 милиони евра.
Атлетико Мадрид, пишува „Марка“, се чини не можеше да спречи заминување на Французинот од причина што тој ги договорил личните услови со германскиот гигант кој на 1 јануари се очекува да го официјализира договорот на четири години.
Ернандез е дете на Атлетико Мадрид. За тимот од Ванда Метрополитано дебитира на 18 годишна возраст, под водство на Диего Симеоне играше и како бек и како стопер, а кај Дидие Дешамп беше стандарден на Светското првенство во Русија.