По половина час убедување меѓу Груевски и неговите адвокати од една и судијата Огнен Ставрев од друга страна, се одлучи следното рочиште за случајот „ТНТ“ за уривањето на Космос на Фијат Цаноски, кога треба да се слушаат т.н бомби, да биде на 5.април, јавува репортерот на НОВА, Бранислав Закев.
Образложението на одбраната беше дека се подготвувале за изведување на други докази, а не за слушање на бомбите.
Најгласен во судницата беше Груевски кој прво реагираше на тоа што судијата најави дека ќе се работи цел ден, а потоа и затоа што ќе се слушаат прислушуваните разговори, вкупно 26, меѓу кои, според бројката има и досега необјавени аудио-снимки.
Во врска со траењето на рочиштето, Груевски пред судијата Ставрев наведе дека по втор пат се правело ваков преседан и дека нему не му е проблем да работи до доцна, бидејќи тоа го правел кога ја водел Владата, но во конкретниот случај рече дека чувствува оти Судот е под притисок и затоа постапува така.
Во однос на бомбите, поранешниот претседател на ВМРО-ДПМНЕ истакна дека не е фер тоа што Судот го менувал редоследот на изведување на доказите.
„Аудио-снимките во листата на докази од 27 страници, се на 25 страна. Ако сте планирале тие да се изведуваат сега, требало да бидат на 2 или 3 страна. Ова не е фер“, рече поранешниот премиер.
На ова се надоврза еден од неговите адвокати Димитар Дангов, кој во име на сегашната добра соработка, го молеше судијата да го одложи слушањето на бомбите.
Адвокатот Стерјо Зиков рече дека, да знаеле дека ќе се слушаат бомбите, ќе викнеле технички советник, а обвинетиот поранешен градоначалник на Гази Баба, рече оти ќе го повлече полномоштвото за неговиот адвокат Боро Тасевски, затоа што не е спремен за денешното рочиште.
Судијата на барањата одговори дека им дал цел месец да се појават на подготовки околу рочиштето и организирал два пати судница за да извршат увид во бомбите, но адвокатите воопшто не се појавиле.
На крајот, судијата сепак одлучи да го одложи денешното рочиште, а за утврдување на датумот за следното, беа потребни уште 10, 15 минути за да се утврди термин поради зафатеноста на адвокатите и обвинетите со други судења.
На прашање на Ставрев кога имаат други судења, Груевски рече дека поточно е ако го праша кога немал.
На крај, се договорија рочиштето да продолжи на 5.април.