Мета на експлозивни направи во Дортмунд биле фудбалерите на Борусија. Бомбите биле активирани во моментот кога нивниот автобус поаѓал од пред хотелот кон стадионот „Вестфален“ на меч со Монако во Лигата на шампиони.
Марк Бартра е единствениот повреден во инцидентот поради кој УЕФА го одложи фудбалскиот натпревар за утре попладне (18,45 ч.), но не е животно загрозен. Се огласи и лично играчот, неговата состојба ја потврди и Ханс-Јоаким Вацке, генерален директор на бундеслигашот.
„Има повреда на раката што не е опасна по живот“, истакна Вацке.
Тој откри за известување што го добил од полицијата дека експлозивот бил скриен во грмушка кај излезот од хотелот и направата била активирана при минување на автобусот. Притоа нагласи дека сите во клубот се наоѓаат во „тотален шок“ по инцидентот.
„Треба да се обидеме да ја „свариме“ ситуацијата бидејќи ќе играме во период од 24 часа. Тоа е наша работа. Екипата е во шок“, додаде Вацке.
За немилиот настан што, за среќа, мина без посериозни последици се отвори и Роман Бирки, голман на Борусија, кој истакна дека ја почувствувал експлозијата во моментот кога автобусот почнал да се движи.
„Беше голема, силна експлозија. Бевме во шок. Никој не мислеше на натпреварот“, нагласи Бирки кој седел во последниот ред на автобусот до Бартра кој е единствено настрадан по парчињата стакло. Фудбалерите веднаш побарале засолниште бидејќи не биле сигурни дали ќе следува нова експлозија, а полицијата брзо пристигнала на местото на настанот.