Бразил и Колумбија договорија хуманитарен пријателски натпревар меѓу фудбалските репрезентации на двете земји. Мечот ќе се одигра кон средината на јануари, а собраните средства ќе бидат наменети за семејствата на жртвите во авионската несреќа крај Меделин во која загинаа 19 играчи, членови на стручниот штаб, лица од персоналот и директорот на Шапекоенсе.
Местото на одигрувањето на мечот, како што истакна портпаролот на бразилскиот фудбалски сојуз, ќе го одреди Шапекоенсе. Од клубот, пак, порачаа дека размислуваат за две опции. Првата е „Маракана“ во Рио де Жанеиро или на нивната „Конда арена“ чиј капацитет изнесува 19.000 седишта.
Леталото со кое се превезуваше експедицијата на Шапекоенсе на финалето со Атлетико Насионал во Копа Судамерикана се урна во близина на Меделин минатата недела. Трагичната несреќа однесе 71 човечки живот, шест лица преживеаја од кои тројца се фудбалери на екипата во бразилската Серија А.