Лидерите на Франција и на Германија им порачаа на земјите од Западен Балкан дека британското гласање за напуштање на Европската унија нема да биде закана на евентуалното проширување на Унијата.
– Одлуката на Велика Британија на никаков начин нема да влијае врз ангажманот на ЕУ кон балканските земји, во согласност со условите кои се поставени пред нив. Ова беше потребно да се нагласи, бидејќи ние дадовме збор“, изјави францускиот претседател Франсоа Оланд по самитот за Западен Балкан што се одржа во Париз.
Германската канцеларка Ангела Меркел ги увери земјите од југоисточна Европа дека таа е посветена да ги води кон Европската унија, и покрај тоа што блокот се соочува со кризата предизвикана од одлуката на Обединетото кралство да ја напушти унијата.
Забелешките на Меркел искажани вчера на Конференцијата за Западен Балкан, која беше организирана од францускиот претседател се сигнал дека Германија го оддржува дипломатскиот притисок да го стабилизира регионот кој се интензивираше откако Русија го анектираше Крим од Украина во 2014 година.
-Беше многу важно да се нагласи дека перспективата за членство на земјите од Западен Балкан останува недопрена,” изјави Меркел. “Одлуката што ја донесе Велика Британија не го менува тоа на било кој начин. Тоа е она од што овие земји се плашат“, рече таа.
Дека проширување на ЕУ ќе продолжи и притоа е важно европските институции да бидат кредиблни во тој процес, потврди и шефицата на европската дипломатија Федерика Могерини по самитот.
Според неа, проширувањето на ЕУ е многу важно за мирот и стабилноста, но исто и за интересот што Европејците го имаат за напредување на балканскиот регион кон Европската унија. „Овој Самит е важен и за нашата безбедност, бидејќи миграциската криза се уште постои и ризикот од радикализација во регионот не обврзува да работиме заедно. Ова е важен состанок тука и ќе работиме и на дневно ниво за да го направиме овој процес реалност за секоја од шесте земји од Балканот, изјави Могерини.
На Самитот во Париз беа шефовите на држави или влади на Албанија, Босна и Херцеговина, Косово, Македонија, Црна Гора, Србија, Хрватска, Словенија, Австрија, Германија, Италија и претставници на ЕУ. Домаќин беше францускиот претседател Франсоа Оланд.
Во Декларацијата издадена од Елисејската палата стои дека „повеќе од кога било, владеењето на правото е во центарот на процесот на проширување, особено во однос на реформите во правосудството, борбата против организираниот криминал и корупцијата, како и целосното почитување на основните човекови права“.
Учесниците потпишаа договор да ја засилат размената помеѓу младите, како начин за надминување на последиците од војните во регионот во 1990-тите и надминување на етничките и национални бариери. “Се занимаваме со политички процеси, кои се уште не се лесни”, рече Меркел.
Ова е трет Самит меѓу ЕУ и балканските земји. На самитот учествуваат шефови на држави и влади и министрите за надворешни работи и економија. Ќе биде организиран и Бизнис форум на кој ќе се разговара за можни инвестиции.