Министерот за надворешни работи, Никола Димитров денес се сретна со новоименуваниот амбасадор на Соединетите Американски Држави, Кејт Мари Брнс, која му ги предаде копиите на акредитивните писма за  именување за амбасадор.

„Извонреден напредок е направен во Северна Македонија. Важно е да се искористи овој моментум кон отворање нови можности и перспективи за државата“ рече Брнс.

Министерот се заблагодари за континуираната поддршка од САД за остварување на евроатланските аспирации на нашата држава, со увереност дека истата ќе продолжи со несмален интензитет и во иднина.

„Доаѓате во време на можности. Имаме многу направено во правец на исполнување на нашите клучни стратешки цели, иако останува уште работа пред нас. Нашиот прогрес ќе овозможи позитивно да влијаеме врз европскиот и евроатлантскиот пат на регионот “ – рече министерот Димитров.