Граѓаните мора да се бидат уверени дека нивните случи ќе бидат сослушани од неутрални и независни судови во разумен рок. Ова е основен принцип во секоја слободна и функционална демократија, рече Брнз
Американската амбасадорка во Скопје, Кејт Брнз, на конференција пред судиите денеска изјави дека македонските граѓани немаат доверба во судството. Повикувајќи се на анкетата на „Еуротинк“, дека само 8 отсто од граѓаните имаат доверба во судството, таа изјави дека неопходно е да се врати довербата кај граѓаните за да видат дека системот функционира.
– Не е тајна дека јавноста не верува во судството. Неодамнешната анкета на „Еуротинк“ покажа дека само 8 отсто од граѓаните на Северна Македонија имаат доверба во судството и во обвинителството. Има многу за работа, очигледно, вклучувајќи судски реформи и зајакнување на институциите, но исто така треба да се адресираат и перцепциите – луѓето треба да видат и да почувствуваат дека системот функционира. Граѓаните мора да се бидат уверени дека нивните случи ќе бидат сослушани од неутрални и независни судови во разумен рок. Ова е основен принцип во секоја слободна и функционална демократија, рече Брнз на меѓународната судска конференција „Судска независност низ реформскиот процес – очекувања и реалност“ во Скопје.
За да ја заслужи почитта од своите граѓани, додаде таа, судството мора да биде ефикасно, независно и да го спроведува законот еднакво за сите.
– Само ако сите судии прават повеќе од она што се очекува од нив кога ја дале заклетвата, може да се постигне враќањето на довербата на јавноста, додаде Брнз.