Челзи и Атлетико Мадрид постигнаа договор за Алваро Мората (26) за трансфер на шпанскиот репрезентативец од „Стемфорд Бриџ“ на „Ванда Метрополитано“. Лондонските „сини“ во зимскиот преоден рок го позајмија напаѓачот на 18 месеци во тимот на Диего Симеоне од каде го чекаа назад по завршување на сезоната 2019/20.
Но, прикажаните игри на Мората го задоволија раководството на Атлетико М. кое изрази упорност, конкретност и голема желба да го задржи во што и успеа и по претстојната натпреварувачка сезона. Изминатите шест месеци одигра 17 меча за вицешампионот на Шпанија и постигна шест гола, па затоа и понудениот перманентен договор за сума од 50 милиони фунти.
Шпанскиот фудбалер се пресели во Челзи во 2017 година од Реал Мадрид. На Островот беше претставен како големо засилување за премиерлигашот меѓутоа не успеа да се наметне докрај иако имаше солиден вовед во новата средина. Одигра 72 меча во кои постигна 24 гола за Челзи и по пауза од нецели две години, сепак, се врати во Примера каде и ќе остане со надеж дека ќе излезе во преден план по заминувањето на Антоан Гризман во Барселона.
Атлетико Мадрид веќе потпиша договор и со Жоао Феликс од Бенфика (19) за сума од 113 милиони фунти со што Португалецот стана петти најскап фудбалер на сите времиња.