Филмската животна приказна на Челзи Менинг, трансроден војник и несреќен борец за вистина, доби нов пресврт, кој по многумина е најправеден.
Тоа жешко мајско утро во Багдад во 2009 година, тогаш 22-годишниот американски војник Бредли Менинг реши на светот да му открие доверливи тајни на САД, со чија политика и дела не се согласуваше.
Благодарејќи нему, Викиликс го објави најголемиот обем на доверливи документи коi некогаш излегле во јавноста. Меѓу нив се и 250.000 американски тајни депешеа и уште половина милион воени документи кои во светот станаа познати како „Воени дневници од Ирак и Авганистан“.
Речиси 10 години подоцна, од кои скоро девет помина зад решетки во американскиот затвор Форт Левенворт, во неговиот живот се случија многу работи. Пред се, Бредли го промени полот и стана Челзи.
Неколку пати Челзи поради енормен притисок се обиде да изврши самоубиство во затворот. Јавноста беше поделена: една страна ја сметаше за предавник, обвинувајќи ја дека нејзините објави биле катализатор за почеток на Арапската пролет, а потоа и хаосот на Блискиот исток.
Другата страна, пак, ја сметаше за херој кој на светот му откри воени злосторства кои американските војници ги направиле во Ирак и Авганистан, како нападот на Багдад, кога американските „апачи“ масакрираа група од десет мажи меѓу кои и репортери на „Ројтерс“. Исто така, благодарејќи на Менинг јавноста дозна за масакрот во Гранаи, кога американската војска ликвидираше меѓу 86 и 147 авганистански цивили.
Трети се прашуваа како е воопшто можно еден психички нестабилен млад аналитичар заробен во туѓо тело да дојде до најчувствителни државни тајни и да ги пушти во јавност.
Американскиот суд немаше милост и ја осуди Менинг на 35 години затвор. Но, поради силните апели и отворени писма што ги потпишаа стотина академици и јавни личности за ослободување на Челзи, претседателот на САД, Барак Обама реши дека на самиот крај на својот мандат ќе ја помилува Менинг.
Таа на слобода ќе излезе во мај, а за таков епилог можеби најмногу треба да му заблагодари на Џулијан Асанж, кој вети дека ќе се предаде кога таа ќе биде ослободена.
Радоста и, по многумина, праведна разврска би можела да ја расипе Доналд Трамп, кој најави дека ќе ја поништи одлуката на Обама. Челзи, Асанж и сите оние за кои вистината и транспарентноста се на прво место се надеваат дека новиот американски претседател ќе се предомисли.