Македонија го заврши настапот на 25. Светско првенство во ракомет. Репрезентацијата која е во почетна фаза на подмладување и овојпат е елиминирана во осминафинале, фаза што беше крајна и при настапите на мундијалите во 2013 година во Шпанија и во 2015 во Катар. „Црвено-жолтите“ четврт-финални соништа, по Германија и Словенија, попладнево во Албервил ги урна и Норвешка која убедливо славеше со 34:24.
Заморот, неиграњето на Миркуловски и Манасков и промашените зицери беа пресудни за поразот од Норвежаните. Особено ова се однесува на второто полувреме. И покрај стативите што неколку пати беа погодени, Македонија беше рамноправна и на теренот и на семафорот по половина час игра (12:10). Но, второто тргна лошо и заврши со двоцифрен минус на што кумуваа избрзаните реакции, погрешни додавања и лесно примени голови од полето на противникот и по полуконтри и контри кога и Колев и Трајковски беа на клупата.
Селекторот Лино Червар истакна дека е задоволен од севкупниот настап на националниот тим на ова СП. Заморот, вели тој, потоа отсуството на двајца од клучните ракометари, промашените зицери беа решавачки за поразот. И, секако, квалитетот што е на страна на Норвешка која неспорно важеше за фаворит пред натпреварот.
„Да бидеме реални, Норвешка беше подобра. Отсуството на Миркуловски и Манасков беа голем хендикеп за нас. Промашивме и неколку зицери во првиот дел, во вториот останавме без сила. Сето тоа пресуди. На играчите што настапија немам што да им забележам. Можеме да бидеме задоволни од настапот на ова Светско првенство. Горди се враќаме дома“, истакна селекторот по средбата со Норвешка.
Кире Лазаров на сите мечеви на овој мундијал беше најефикасен македонски ракометар. Така беше и денеска. Капитенот постигна шест гола колку и Магнус Јондал и Еивинд Танген за Норвешка. По пет реализираа Стојанче Стоилов, Сандер Сагосен, Бјарте Мирхол и Кристијан Бјорнсен.
Пласман во четврт-финале осигура и Франција по победата над Исланд со 31:25. Во терминот 20,45 часот ќе играат Бразил – Шпанија и Русија – Словенија.
Норвешка – Македонија 34:24 (12:10)
Олимписка сала во Албервил. Гледачи: 4.500. Судии: Ренарс Лицис и Зигмарс Сондорс од Летонија.
Норвешка: Кристенсен (2 одбрани), Бергеруд (10 одбрани), Сагосен 5, Хикеруд, Мирхол 5, Оверби, Тонесен 1, Јондал 6, Бјорнсен 5, Линдбо, Гулеруд 3, Род 1, О’Саливен, Танген 6, Јоханесен 2, Хансен. Селектор: Кристијан Берге.
Седмерци: 2/3. Исклучувања: 4 минути. Загубени топки: 5
Македонија: Колев (6 одбрани), Трајковски (3 одбрани), Стоилов 5, Арнаудовски, К. Лазаров 6, Митков 2, Дрогришки 1, Талески 1, Миркуловски, В. Маркоски, Н. Маркоски 3, Георгиевски 1, Ф. Лазаров 1, Ојлески 1, Нелоски, Пешевски 3. Селектор: Лино Червар.
Седмерци: 3/3. Исклучувања: 8 минути. Загубени топки: 10
СП во ракомет
Осминафинале
Норвешка – Македонија 34:24
Франција – Исланд 31:25