Меѓу компаниите кои пријавиле до Фондот за иновации дека во својата сопственичка структyра имаат носител на јавна функција се и фирми поврзани со поранешниот министер без ресор Веле Самак и поранешниот амбасадор Јован Донев.
На повикот од Фондот за иновации, компаниите апликанти – добитници на средства од првиот повик од Планот за економски раст да се изјаснат дали во својата сопственичка структура имаат носител на јавна функција или член на негово потесно семејство, се пријавиле четири фирми.
Изјави поднеле компаниите: „Микросам Прилеп АД“ – Веле Самак, акционер, министер без ресор, задолжен за странски инвестиции во Владата на Република Македонија, функцијата ја извршувал заклучно со 30.05.2017 година.
„Контура ДОО Скопје“ – Елена Донева, сопственик, член на потесно семејство на Јован Донев поранешен амбасадор во МНР на Република Македонија, функцијата ја извршувал заклучно со 28.02.2017 година.
Т-Сенс консалтинг ДОО Скопје“ – Мерита Адеми, малцински содружник, член на потесно семејство на Асаф Адеми, министер за култура во Владата на Република Македонија од 01.06.2018 година. Од страна на компанијата до Фондот е доставено и известување за извршена промена на сопственичката структура односно бришење на лицето Мерита Адеми.
Како дополнение на изјавата, во посебен документ, лицето Христина Керкез, еден од сопствениците на „Декодикс ДОО експорт – импорт“ Скопје декларира поврзаност, како член на потесно семејство на Цветанка Ласкова, посебен советник во Канцеларијата на Претседателот на Владата на Република Македонија, иако посочената советничка не е носител на јавна функција.
Инвестициските проекти на овие четири компании, како што велат од Фондот за иновации и технолошки развој, ќе бидат повторно доставени на разгледување до Комитетот за одобрување на инвестиции, според критериумите за селекција и согласно правилниците на повикот.
Од Фондот за иновации објаснуваат дека на повикот се пријавиле и фирми кои се поврзани со поранешни функционери, затоа што „носител на јавна функција, според дефиниција е секој кој бил на јавна функција, две години по разрешувањето или завршувањето на мандатот“.
За следниот јавен повик, секоја компанија при аплицирањето ќе треба да декларира дали во сопственичката структура има лица кои се носители на јавни функции. Ова следува по реакциите во јавноста околу распределбата на грантовите на Фондот на кој аплицираа 235 компании, а во првиот инвестициски план беа одобрени проекти на 79 фирми.
Во меѓувреме вицепремиерот Кочо Анѓушев ги повика своите бизнис партнери да се откажат од сумата од 160 илјади евра, пари кои преку државниот Фонд за иновации ги доби фирмата Каст инвест каде малцински ко-сопственик е Анѓушев.
И печатницата „Гинис“ од Прилеп каде еден од ко-сопствениците е пратеникот Хари Локвенец се откажа од државните субвенции што ги доби од Фондот за иновации.
Јавното обвинителство за организиран криминал најави дека ќе испитува дали Фондот за иновации и технолошки развој направил злоупотреби при доделување на грантови.
„Основното јавно обвинителство за гонење на организиран криминал и корупција оформи предмет по допрен глас.Обвинителството презема дејствија за утврдување на факти во предметот, а во врска со евентуални сторени кривични дела во постапката по јавен повик за финансирање проекти во рамки на третиот столб од Планот за економски раст – прв инвестициски бран“ соопштија од Обвинителството.
Со останатите компании од првиот инвестициски бран што доставиле изјава во која нема носител на јавна функција и/или член на негово потесно семејство во сопственичката структура ќе се склучат договори за реализација на инвестициските проекти.
Исплатата на средствата, согласно процедурите на Фондот, ќе се реализира квартално. Првата рата ќе се исплати веднаш по потпишување на договорите и откако фирмата ќе достави доказ дека е уплатен нивниот финансиски удел.