Претседателот на ДИК Александар Чичаковски и потпретседателот Реџеп Прекопуца денеска имале консулатции со претседателот на Собранието Трајко Вељаноски.
Според информации од Собранието, тема биле роковите, по синоќешното распуштање на Парламентот.
Од ДИК не ја коментираат средбата. Информираат дека продолжуваат со активностите за прочистување на Избирачкиот список.
Деновиве треба да се одлучи за резултатите од теренската проверка, што заврши во неделата. Од 87.000, 40.000 лица воопшто не им отвориле врата на анкетарите и не се јавиле самите во подрачните канцеларии.
ДИК треба да одлучи дали уште ќе ги чека, дали пак ќе ги повикува или ќе побара институциите да утврдат каде се овие гласачи и зошто не соработуваат. Истовремено, треба да се разгледа и содржината на пополнетите прашалници за да се види дали има фантомски гласачи или непријавени иселеници.
Од административната проверка, најобемна задача ДИК ќе има откако ќе стигне целосната информација од МВР за 72 илјади граѓани што ги има само во оваа база на податоци.
Оваа група спорни записи ги опфаќа проблематичните живеалишта, гласачите од Пустец кои се концентрирани по десетици во еден стан и гласачите кои имаат лична карта а немаат пасош и обратно, а откриени се 67 кои го немаат ниту едното ниту другото.
Засега, од Избирачкиот список треба да се избришат само 1.100 избирачи за кои има документ дека се починати.
Претседателот Чичаковски рече дека како прв човек на ДИК нема да го потпише списокот ако остане макар само еден сомнителен гласач.
Доцна синоќа, тројцата членови на ДИК – експерти беа на разговори во канцеларијата на Европската унија, но нема детали од средбата.