Жестоката дебата за политиката криза помеѓу членот на Ад-хок телото за медиуми, Цветин Чилиманов и поранешниот пратеник, Сафет Бишевац на телевизијата 24 Вести, вчера вечер премина и во лични напади.
„Сафет ти си бегалец, од некоја земја дојден тука, си добил државјанство“, гласеа зборовите на Чилиманов кои ја вжештија атмосферата во студиото на вчерашната дебата на ТВ 24Вести и новинарката Душица Мрѓа мораше да повика да бидат пуштени реклами.
Бишевац и Чилиманов дебатираа за политичката криза и изборите, но атмосферата стана тензична кога се споменаа гласачите од Пустец. Според Чилиманов, тие се легитимни државјани на Македонија, додека Бишевац истакна дека тие се дел од местењето на изборите.
„Чилиманов: Губат како магариња на сите избори.
Бишевац: Во бомбите на Заев се виде како ги губеле изборите, ептен видовме.
Чилиманов: Е како, со Пустец. Сафет ти си бегалец од некоја земја дојден тука си добил државјанство. Ние имаме луѓе од Албанија, Македонци, кои побарале државјанство, кои се три, четири илјади преку сила. И сега Катица Јанева и Заев го апсат градоначалникот на Пустец како куче, што признава дека е нелегитимно што во Македонија на македонски граѓани им дале државјанство, на луѓе кои не можат промил да влијаат врз изборите. Тие не можат локални да ги свртат, а не па национални кои СДС ги губи со 200 илјади. Доста со овие приказни, напорно е, дајте искочете на избори, ќе изгубите и готово. Ако добиеш некое пратеничко место со среќа, ако не, со здравје.
Бишевац: Јас како тебе кој е политички неутрален, треба да отидам во Kабинетот на претседателот на државата, тоа е едно. Значи јас сум на пример бегалец од Сирија, паднат од Марс… Второ, со кое бре право ти си земаш за слобода, да ме наречеш бегалец, кој е дојден овде. Со кое право, освен фашистичко“, гласеше жестокиот дијалог кој може да се погледне во видеото од петнаесеттата минута (15:26).
НОВА разговараше со Чилиманов и го праша дали смета дека како член на Ад хок телото за медиуми е соодветна една ваква реченица за него.
„Сметам дека е соодветна реакцијата бидејќи се прави обид да се проблематизира доселување од други држави во Македонија, и сметам дека е иронично доколку тој проблематизира зошто некој друг се доселил, конкретно од Република Албаница, Пустец“, рече Чилиманов.
На прашањето дали смета дека неговата порака е ксенофобична кон еден дел од граѓаните кои живеат во оваа земја, Чилиманов рече дека нема никаква ксенофобија, туку напротив, тој не сакал никого да спречи да се досели во Македонија, туку Бишевац сакал да спречи.
Сафет Бишевац за НОВА вели дека, како што и вчера истакнал, се работи за еден фашистички пристап.
„ И да е така не значи дека некој не е човек и не треба никој со некого така да се однесува. Јас не сум ни бегалец ниту било кој има право некој да разговара со некого на тој начин, но тоа го покажува односот на една мала група на луѓе кои во оваа земја мислат дека се сопственици на тлото, земјата, воздухот, и тие треба да даваат дозволи кој и како треба да живее. Сакам да верувам дека тука Чилиманов не бил доволно концентриран во дебатата, затоа што го знам од порано, и сакам да верувам дека тоа е нешто што нема да му се повтори никогаш“, рече Бишевац.
Од Советот на честа на ЗНМ, како и од Советот на етика за медиуми велат дека не сакаат да ја коментираат дебатата, бидејќи тие постапуваат само по претставки кои се доставени до нив од страна на индивидуалци или здруженија.