Спасувачките екипи и натаму трагаат по преживеани под урнатините по двата силни земјотреси што ја погодија Венецуела во близина на главниот град Каракас. Според официјалните податоци, бројот на загинати се искачи на над 1.000, повредени се најмалку 3.360 лица, а околу 4.000 останале без своите домови.
Во катастрофата се оштетени 383 згради, меѓу кои 13 болници и 25 трговски центри, како и повеќе од 1.000 други инфраструктурни објекти. Властите соопштија дека од најтешко погодената област Ла Гваира биле спасени 243 лица, додека потрагата по исчезнатите продолжува. Во меѓувреме, неофицијални извори објавија список со повеќе од 51.000 исчезнати лица, што значително се разликува од официјалните податоци.
Велика Британија испрати спасувачки тим од 68 членови со шест специјално обучени кучиња, како и почетна хуманитарна помош во вредност од два милиони фунти. Спасувачките операции продолжуваат со поддршка и од меѓународни тимови, додека властите предупредуваат дека бројот на жртвите може дополнително да расте.