Еден килограм запленет кокаин, кој бил дел од многу голема количина дрога, чија крајна дестинација била нашата земја, приведени четири лица, отворање на финансиска истрага за правното лице во чии простории е пронајдена дрогата, истрага за евентуална вмешаност на други физички и правни лица, засега се резултатите од вчерашната акција на полицијата во селото Крушопек во скопски Сарај.
Ова денеска на прес-конференција го изнесе техничкиот министер за внатрешни работи, Наќе Чулев, кој не сакаше да каже за колкава количина на дрога станува збор, со оглед на тоа што некои медиуми излегоа со написи дека пратката вкупно содржела 1,3 тони кокаин, нагласувајќи дека во моментот во интерес на истрагата не може да кажува официјално такви податоци, но напомена дека станува збор за „многу, многу голема количина“. Тој истакна дека дрогата по потекло била од Колумбија, а кокаинот е пронајден во магацин за овошје на правното лице „Банекс компани ДООЕЛ“.
Операцијата се спроведувала од 17 до 19 февруари, а до доцна синоќа Единицата за специјални операции вршела претреси во магацинот на „Банекс компани ДООЕЛ“, која во 120 наврати извршила увоз на овошје во најголем дел од Колумбија, а во помал обем и од Еквадор.
„Одделот за сузбивање на организиран и сериозен организиран криминал, Единицата за недозволена трговија со дрога во период од 17 до 19 февруари во 2020 година, во координација со јавен обвинител од ОЈО за гонење на организиран криминал и корупција, а во рамки на меѓународна полициска соработка во која беа вклучени повеќе земји, реализираше акција за недозволена трговија со дрога, при што во скопското село Крушопек беше запленет еден килограм кокаин, кои се само дел од поголема количина, која треба да заврши во нашата држава“, рече Чулчев.
Синоќа околу девет часот на граничниот премин „Ќафасан“ е евидентирано товарно моторното возило „Ивеко“ влекач и приколка, управувано од 31 годипниот Ј.К. државјанин на Црна Гора, кој по завршување на царинските формалости се упатил кон Крушопек. Полицијата, по претходно обезбедена судска наредба, извршила претрес во магацинот за овојше и во моментот на пристигнувањето на камионот таму бил Ј.Е. (22), син на сопственикот на правното лице, кое е краен примач на стоката и Р.И. (51), кој бил вработен во магацинот и вршел истовар на робата. Во меѓувреме, во правното лице, пристигнал и С.Е. (47) од Скопје. Сите четворица се лишени од слобода и ноќта ја минаа во полициска станица, а денеска треба да бидат изведени пред судија на претходна постапка.
„При извршениот детален претрес, во еден од пакетите било пронајдено правоаголно пакување со бела прашкаста материја, кое била залепена со зелена трака“, рече Чулев и додаде дека во операцијата се одземени мобилни телефони, околу 3.000 евра, 700 долари и 188.000 денари, „Ивеко“ товарното возило, заедно со 98 пакети банани, документација, технички уреди“, рече Чулев.
Тој нагласи дека МВР деновиве ќе преземе опсежни мерки за известување на земјите низ кои минал транспортот, а освен меѓународни активности ќе се преземат и активности за останатите физички и правни лица кои евентуално се во корелација со ова правно лице. Чулев додаде дека во текот на денот ќе има и финансиска истрага кон правното лице.
Операцијата, повтори Чулев, е меѓународна, но тој не сакаше да споменува конкретни држави кои се вклучени заради заштита на истрагата.