Вонредниот надзор утре ќе продолжи во Институтот за судска медицина.
На барање на министерот за здравство, Беким Сали, во тек е вонреден инспекциски надзор во ЈЗУ Здравствен дом Скопје – Итна медицинска помош, во Ургентниот центар и во КАРИЛ , изјави за НоваТВ, д-р Ирина Бухова Сотирова, директорка на ДСЗИ.
Вонредниот надзор, кој го иницираше синоќа министерот Сали, по смртта на ракометарот на РК Бутел Денис Тот, утре ќе продолжи во Институтот за судска медицина.
– По завршувањето на истиот, за констатираната состојба ќе биде известен министерот, додаде д-р Бухова Сотирова.
Од ТОАРИЛУЦ КАРИЛ денеска испратија соопштение во врска со приемот и лекувањето на ракометарот Тот, кој почина завчера откако бил претепан пред дискотека во Градскиот парк по што паднал во бессознание.
Екипа на Итната медицинска помош, како што веќе објавивме, интервенирала веднаш по повикот околу 4 часот изутрина и му укажала итна помош, а лекарите утврдиле слаб пулс и ниска сатурација, дека бил помодрен во лицето и во лоша здравствена состојба.
Потоа 28-годишниот ракометар бил пренесен во Ургентниот центар на скопските клиники, каде бил реанимиран и поставен на апарати за дишење, но по еден ден починал на КАРИЛ.
ОЈО вчера поведе истрага против три лица од Скопје кои со клоци и боксови по телото и по главата го удирале ракометарот, по што тој паднал со главата наназад на асфалтот.
Две лица се приведени, а едно е во бегство и по него е распишана централна потерница.
(Љ.Б.)