На вакциналните пунктови во државата и на терен, до вчера се вакцинирани вкупно 500.995 граѓани. Но за да стекнеме колективен имунитет против ковид-19 вакцина треба да прими 85 отсто од населението, порачуваат епидемиолозите. Надлежните најавуваат дека е можно воведување на порестриктивни мерки од есен за заштита од ковид-19.
Министерот за здравство, Венко Филипче, денеска изјави:
– Нема да имаме друга можност освен да воведеме некаква форма на рестрикција. За мерките е разговарано и дополнително ќе разговараме со цел да го заштитиме целокупното друго население, а тие мерки ќе се однесуваат на невакцинираните. За конкретните мерки ќе се разговара подетално во август, изјави денеска Филипче.
Д-р Александар Стојанов, епидемиолог во скопскиот Центар за јавно здравје за НоваТВ вели дека проблемот со вакцинацијата не е само со заштитата од ковид-19, туку од поодамна, и со заштита од други болести.
– Нема друго чаре освен вакцинација против ковид-19, и тоа за да имаме колективен имунитет треба 85 отсто од населението да се вакцинира. А ние веќе со години наназад имаме проблем и кај редовната, задолжителна вакцинација, бидејќи дел од родителите не сакаат да ги вакцинираат своите деца, па надлежните се обидуваа со потврди за запишување во градинка или во училиште да ги премислат. Но сега е пандемија, вонредни се условите во целиот свет, па очекуваме моралниот момент да преовлада кај граѓаните. Но зачудува што кај докторите на пример, има само 35 отсто вакцинирани, а тие и со заклетва се обврзале дека ќе лекуваат луѓе, а со ова го ставаат и своето здравје на коцка, но и здравјето на пациентите! Сега-засега со закони сме ограничени, а и не сме Северна Кореја за некои ригорозни одредби да се донесат. Но се чини дека нема друго чаре, освен со наредба за вакцинирање на јавните служби, како војска, полиција помасовно да се заштитиме од ширење на вирусот – вели д-р Стојанов.
Тој додава – знаев дека ќе дојде до ова, сите трчаа првиот ден да се вакцинираат, а сега треба да ги молиме граѓаните…
– Тоа е и еден светски феномен – отпорот кон вакцинација, но нагласувам – нема друго чаре освен вакцинација! Еве веќе се јавува и делта 1 подсој на вирусот, па затоа решение е 85 отсто од граѓаните да се вакцинараат за да има колективен имунитет. Инаку, да, точно е дека ни една вакцина не е 100 отсто ефикасна, тоа варира…но се додека не се извакцинира поголемиот дел од населението, нема да стекнеме колективен имунитет од вирусот – додава д-р Стојанов.
Тој се осврнува и на вакцинација на децата.
– Септември е блиску, само уште еден месец и децата најверојатно ќе треба да тргнат на редовна настава во училиштата. И не само на настава, младите треба да се вљубуваат, забавуваат… А од 1800 пријавени деца за вакцина, досега 600 ја примиле, а колку ученици има? Фајзер е безбедна вакцина и за деца и нив треба да ги заштитиме од зараза со вирусот. Повторувам – друго чаре нема, освен вакцинација во поголеми бројки, бидејќи бенефитот од вакцината е многу поголем отколку ризикот од вакцинацијата! Се паѓа во вода, ако самите не разбереме дека најдобра зашптита од коронавирусот е вакцината – порачува епидемиологот Стојанов.
Љубица Балабан