Вкупно 13 демонстранти се приведени на синоќешните протести во центарот на Скопје по одлуката на претседателот Ѓорге Иванов да ги аболицира сите политичари од власта и опозицијата за кои се водат постапки.
Од полицијата информираат дека приведените се уште се на информативен разговор, а повеќе детали се очекуваат од прес конференцијата на СВР Скопје напладне.
Адвокатот Владимир Данаилов, ангажиран од Хелсиншкиот комитет за човекови права за застапување на четворица од приведените, за НОВА ТВ вели дека се работи за произволно и грубо приведување.
– Беа проведувани со лисици од страна на специјалната полиција само затоа што се затекнале во ек на стихијна полициска акција при одење дома, а не за време на настанот, а при тоа за нив не постоеле сознанија дека учествувале или фрлале и оштетувале предмети. По исказите, за мене не постои никакво дело ниту пак прекршок. Сите беа грубо и непотребно совладани на земја и со лисици приведени . Станува збор за една неселективна и непотребно груба акција на полицијата која може да има за последица застрашувачко влијание кон идно учество на протести и со тоа ограничување на уставно загарнатирано право на протест.
Исто така, според мене непотребно се користи задржувањето во полициска станица за сите an block, до законскиот кмаксимум од 24 часа, иако формалните процедури се завршени за неколку часа по приведувањето, вели адвокатото Данаилов.
Во протестите повреден е еден новинар од порталот Плусинфо и фоторепортер на весникот „Вечер“.
Демонстрантите синоќа, на вториот ден од протестите, ја демолираа Народната канцеларија на претседателот Иванов во центарот на Скопје, при што се искршени прозорците и дел од мебелот од канцеларијата. Искршени се и неколку прозорци на зградата на Министерството за правда.