Генералниот директор за проширување и соседска политика на Европската комисија, Кристијан Даниелсон, денеска во Брисел официјално го означи стартот на подготовките за преговори за членство на Република Макеоднија во Европската Унија, јави дописничката на МИА од Брисел.
Даниелсон пред двата преговорачки тима од Албанија и Македонија изјави дека денеска е “почеток на најинтензивниот ангажман во нашата долга врска“.
– Нашите експерти ќе ја објаснат должината и длабочината на европското заедничко законодавство (acquis communautaire), правилата на ЕУ, рече Даниелсон.
Овие два дена македонскиот и албанскиот преговарачки тим ќе ги слушаат експертите од Европската Комисија како им го образложуваат целокупното законодавство и најдобри практики во областа на правдата и фундаменталните права. Во следната една година ќе се одржат уште 32 вакви состаноци за секое поглавје од преговарачкиот процес, што вкупно ги има 33, или 160 илјади страници европски закони и правила што ќе мора да се преточат во домашното законодавство.
Тимовите ќе имаат уште седумдесет вакви состаноци, истакна Даниелсон.
-Мора да има заедничко разбирање за тоа што се правилата на ЕУ за да се подготвите за идното членство, изјави директорот.
Даниелсон посочи дека состанокот за денешното поглавје 23 е фундаментално, не само поради тоа што е тоа новата преговарачка методологија на Европската комисија со новите земји кандидати, туку дека токму реформите поврзани за правдата и владеењето на правото се условите поставени од Советот на ЕУ за ефикасно почнување на преговорите со ЕУ во јуни 2019.
Османи: Денешниот ден го чекавме 15 години
Ова е историски момент за нашата земја, и за мене вистинска чест како главен преговарач, да го одбележам почетокот на Скрининг процесот, како финална етапа во подготовката за преговори за полноправно членство во Европската Унија, истакна вицепремиерот Бујар Османи на формалното означување на стартот на подготвителната работа за преговори за членство помеѓу Македонија и ЕУ.
Османи посочи на историјатот на приближувањето на Македонија кон Унијата, почнувајќи од Спогодбата за стабилизација и асоцијација во 2001, преку кандидатскиот статус во 2005 година, па се до првата препорака од страна на Комисијата во 2009 година.
– Европската и евроатлантската ориентација на земјата претставува точката на обединување на нашето општество уште од самата независност, а во процесот на приближување кон ЕУ, неповратно се вградени сите претходни влади, пренесувајќи ги интересите на земјата на своите наследници, кои продолжуваат онаму каде нивните претходници застанале, истакна Османи.
Тој ја нагласи и пошироката инклузивност во рамките на овој процес, упатувајќи благодарност и до администрацијата, граѓанскиот сектор, експертската јавност…
– Нам ни е јасно дека започнуваме комплексен процес, кој ќе се одвива во повеќе фази, во кој илјадници страници на т.н. ‘Аки’ (Acquis), треба да бидат транспонирани во македонското законодавство, но дозволете да ве уварам дека мотивацијата и ентузијазмот меѓу администрацијата, граѓанскиот сектор, претставниците на бизнисот, но и воопшто кај граѓаните, од напредокот во евроинтеграциите е на исклучително високо ниво. Ве уверувам дека ние сме подготвени да се справиме со овој предизвик, истакна Османи.
Потсети дека административната структура, успешно ги имплементираше обврските кои произлегуваат од Спогодбата за стабилизација и асоцијација, а се потготвува и за процесот на преговори.
Османи ги претстави трите траектории по кои Владата, но и целата држава ќе се движат во рамките на евроинтегративните процеси.
– Државата паралелно ќе се посвети на имплементација на договорите за добрососедство со Бугарија и Грција, ќе го задржи реформскиот моментум за исполнување на забелешките и насоките на заклучоците од јунските совети, како и цврсти и бескомромисно ќе влезе во исполнување на обврските од објаснувачкиот скрининг, подготвувајќи се со тоа, на сите три полиња паралелно, за почеток на преговорите во јуни следната година, истакна Османи, посочувајќи на историскиот момент за одлука – „шанса која оваа генерација не смее да ја пропушти“.
Обраќања до присутните имаа и министерката за правда Рената Дескоска, како и директорот на Директоратот за проширување на Европската Унија, Кристијан Даниелсон и други претставници на Европската Комисија.
Работната средба на која Европската Комисија ја презентира анализата на поглавјето 23 – правосудство и фундаментални права, за Република Македонија продолжува низ текот на целиот ден, а според агендата, работната група ќе продолжи со работа и во текот на утрешниот ден, кога се очекува да им се приклучи и еврокомесарот за проширување – Јоханес Хан.
Во Европската комисија во Брисел се наоѓа 40-члена делегација составена од експерти од надлежните државни институции кои имаат надлежности во дадената област, предводена од главниот политички преговарач вицепремиерот за европски прашања Бујар Османи, а во нејзиниот состав се и министерката за правда Рената Дескоска, главниот технички преговарач Бојан Маричиќ и експерти од Секретаријатот за европски прашања.