Мајмунските сипаници не се сексуално преносливи болести, но голем број мажи се заразиле со болеста преку сексуален однос, истакна епидемиологот д-р Драган Даниловски во емисијата „10 Минути“ на ТВ21.
„Најмногу од сите пациенти, некаде околу 160 на број, во 16 земји, на три континенти се луѓе кои спаѓаат во категоријата мажи кои имаат секс со мажи. И сега некој ќе каже ‘аха сексуално пренослива болест’, не, не е тоа така. Според тоа како епидемиолошки изгледа сликава за тоа кој заболува се асоцира дека е тоа сексуално пренослива болест, но не е затоа што се пренесува заради тесниот контакт кожа на кожа, бидејќи осипот се јавува и околу гениталиите и при сексуалниот однос доаѓа до подолготрајно триење на тие делови и доаѓа повторно со директен контакт“, вели д-р Даниловски.
Даниловски додава дека заразувањето може да оди и по респираторен пат, затоа што кај оваа болест е карактеристично осипот прво да се јави во устата.
„За да се заразите по респираторен пат треба подолго време еден до друг приближени со заразениот да разговарате или да ви кашла во лице“, истакнува Даниловски.