В.д. директорот на Македонскиот народен театар, Драган Спасов Дац, доцна синоќа на својот профил на социјалната мрежа „Фејсбук“ напиша дека сите актери што вчера ја откажаа претставата „Ничија земја“ во знак на поддршка на притворениот актер Владо Јовановски, ќе бидат казнети.
„Пријатели и љубители на театарот, денеска се случи нешто што не смееше да се случи. Се откажа претстава во МНТ. Покрај мојата сугестија и наредба да се игра претстава, глумците своеволно одбија да ја играат претставата ‘Ничија земја’, како поддршка за приведените глумци кои беа инволвирани во случувањата од 27 април во Собранието. Сите до еден ќе бидат казнети за непослушноста и по разговорот со мене свесни се за проблемот кој го направија“, напиша Дац на Фејсбук.
Тој во својата порака до граѓаните вели дека театарот постои за публиката и така ќе остане.
„Ова го почувствував како атак кон мене и кон нашата публика“, напиша Дац.
Пред полна сала актерите вчеравечер ја одложија претставата „Ничија земја“. Целиот актерски тим излезе пред присутните во МНТ и извинувајќи ѝ се на публиката соопшти дека во знак на протест за притворот на нивниот колега, Владо Јовановски, претставата нема да се одигра.
По ваквата одлука, публиката ја напушти салата.