Санирањето на штетите од невремето што вчера го зафати Делчево продолжи и денеска. Утринава се испумпува водата од подрумите на жителите кои се поплавија по силното невреме со пороен дожд, грмежи и град.
Поплавени беа голем број куќи, а на санирање на штетите уште доцна синоќа, освен пожарникарите од Делчево, работеа и пожарникари од Кавадарци, Кочани, Берово и Македонска Каменица, кои се одѕваа на повикот на градоначалникот на Делчево и помогнаа во справување со последиците од невремето.
Градоначалникот на Делчево Горан Трајковски синоќа рече дека се работи за голема елементарна непогода и дека ништо не можело да ги спречи последиците од невремето, проследено со интензивни обилни врнежи.
„Ова е елементарна непогода. Екипите се на терен – територијалната противпожарна единица, јавното комунално претпријатие, „Македонија пат“, овде е и полицијата која го регулира сообраќајот да можеме побрзо да го ставиме градот во функција и да им помогнеме на луѓето каде што треба..ги контактиравме околните општини, пумпи за испумпување се на пат, имаме организирано, знаеме каде да ги упатиме овие пумпи“ рече Трајковски и додаде дека мора брзо да интервенираат затоа што има поплавени неколку улици и домови.
Тој ги повика луѓето кои имаат поплавени домови да се јават на бројот 193 во Противпожарната служба, каде што се наоѓа и координативниот центар, за службите да знаат каде да интервенираат. Апелираше до граѓаните до денеска наутро да не ја користат водата од водоводниот систем во градот за пиење.
Од фотографии и видеоснимки, што по невремето ги споделуваа граѓани на социјалните мрежи, можеа да се видат поплавени улици, на кои нивото на водата достигнуваше речиси до прозорците на автомобилите.
Дождот, кој на места бил проследен и со врнежи од град со големина на лешник, предизвикал штети на дел од раноградинарските култури и на дел од овошните насади.
Поради големите штети од вчерашното невреме, советниците во Општина Делчево денеска ќе заседаваат на вонредна седница. Претседателот на Советот, Гоце Попов, најавува дека ќе се предложи одлука за прогласување елементарна непогода од поплавите, јави дописникот на МИА.
Се очекува на седницата се донесе одлука за формирање комисија која ќе треба да ги процени штетите, а ќе се објави и јавен повик за граѓаните да пријават штети.
Телефонскиот број 193 е и понатаму останува отворен за пријавување проблеми за интервенции од сттана на ТППЕ Делчево.
С.К,