Контролата над Конгресот се уште „виси“ по вчерашните избори , додека Демократите покажаа изненадувачка сила, победувајќи ги Републиканците во повеќе изборни единици, демантирајќи ги предвидувањата дека високата инфлација и нискиот рејтинг на претседателот Џо Бајден ќе ја повлечат партијата надолу.
Сепак се уште е рано да се каже дека освоените места во Сенатот во Висконсин, Невада, Џорџија и Аризона би можеле да значат победа или задржување на мнозинството. Демократите ги задржаа местата и во Вирџинија, Канзас и Род Ајленд, додека во Њујорк и Калифорнија се уште нема јасна прегледност.
Демократите беа успешни и во трката за гувернери, победувајќи во Висконсин, Мичиген и Пенсилванија – бојни полиња кои беа критични за победата на Бајден над поранешниот претседател Доналд Трамп во 2020 година. Но, Републиканците ги задржаа гувернерските места во Флорида, Тексас и во Џорџија каде Бајден победи тесно пред две години.
Со оглед на тоа што гласовите сè уште се пребројуваат низ целата земја, Републиканците сè уште имаат можност да ја освојат контролата врз Конгресот. Но, резултатите се воодушевувачки за Демократите кои беа подготвени за огромни загуби.
Претседателката на Конгресот, Ненси Пелоси, рече: „Иако многу резултати не се дојдени, јасно е дека демократските членови и кандидатите во Претставничкиот дом силно ги надминуваат очекувањата за изборниот исход“.
Исходот од трката за Конгресот и Сенатот ќе ја одреди иднината на агендата на Бајден и ќе послужи како референдум за неговата политика, додека нацијата се опоравува од рекордно високата инфлација и загриженоста за насоката на земјата. Контролата на Републиканците врз Конгресот, доколку се случи, најверојатно ќе предизвика круг истраги за Бајден и неговото семејство, додека преземањето на Републиканците контрола врз Сенатот ќе ја наруши способноста на Бајден да назначува судии.
Трамп, кој се вклучи во трките низ целата земја, поддржувајќи повеќе од 300 кандидати, се надеваше дека ноќта ќе заврши со триумф на Републиканците, и дека тоа ќе му овозможи непречен пат до Републиканската претседателска номинација во 2024 година, но неговите избраници изгубија на изборите во Пенсилванија, Мичиген, и Њу Хемпшир. Откако ги повика новинарите и неговите најверни поддржувачи да ги чекаат заедно изборните резултати во неговиот клуб Мар-а-Лаго, тој ја заврши ноќта без триумфален говор. Но и преку својата платформа порача дека имал „одлична вечер“.
Во меѓувреме, Бајден ја помина ноќта телефонирајќи им на Демократите за да им честита на нивните победи.
Извор: Асошиетед Прес