Граѓанскиот протест кој точно во 18 часот започна пред СЈО, а продолжи пред Собранието во моментов се одвива речиси низ целиот строг центар на Скопје, јавува репортерот на НОВА Влатко Чаловски.
Демонстрантите од Собранието преку Триумфалната порта се упатија кон Плоштадот со цел да го искажат револтот пред миистерството за култура – институцијата преку која велат дека потрошила огромна сума на пари непотребно.
Демонстрантите се движат во повеќе насоки низ центарот на градот,а сообраќајот е блокиран. Инаку, пристапот до седиштето на ВМРО-ДПМНЕ е блокиран со две хермелинки со водени топови, метални барикади, но со помало присуство на полициај за разлика од претходните денови.
Демонстрантите постојано скандираат ”No pasaran”, а еден од присутните на разглас порача дека протестите нема да стивнат без разлика дали ќе има преговори меѓу политичките партии или не.
На протестите кои веќе втора недела се одржуваат во Скопје по одлуката на Иванов за колективна аболиција, се бара итно повлекување на одлуката за аболиција на сите оние против кои се води истрага и против кои е покренато обвинение од страна на Специјалното јавно обвинителство (СЈО); Итна и неотповиклива оставка на Ѓорѓе Иванов од функцијата Претседател на Република Македонија; Произнесување на Уставниот суд за уставноста на СЈО; Формирање на специјално одделение на Кривичниот суд, кој ќе биде надлежен за случаите под јурисдикција на СЈО; Итно повлекување на одлуката за одржување на парламентарни избори на 5 јуни; Задолжително вклучување и присуство на независни претставници на граѓанското општество во процесот на решавање на кризата, како и формирање на преодна влада која докрај ќе ги имплементира итните реформски приоритети од извештајот на Прибе.
Протести за денеска се најавени и во Штип, Кочани и во Битола. Протестот во Штип започна во 18 часот, пред Основниот суд, а во Битола на плоштадот Магнолија.