Денеска е последниот 26-ти ден од Пописот на населението, домаќинствата и становите во Македонија. До вчера во земјава се попишани вкупно 1.760.194 милиони лица, 546.080 домаќинства и 789.406 станови, додека можноста за самопопишување на лица во странство досега ја искористиле 201.247 граѓани.
Продолжување на Пописот засега не е побарано од Државниот завод за статистика (ДЗС) кој, како што вчера посочи владиниот портпарол Душко Арсовски, ќе го има последниот збор за тоа.
Последниот збор за евентуално продолжување на пописот ќе го има Државниот завод за статистика, информациите од таму се дека на неполни два дена до завршувањето на теренското попишување на целата територија на државата се прават финални проверки за евентуално пропуштени граѓани и веќе се затвораат пописните кругови во Скопје, каде што има најголема концентрација на население, изјави вчера Арсовски.
Директорот на ДЗС, Апостол Симовски изрази уверување дека Пописот ќе заврши во законскиот рок и потврди дека досега немаат побарано продолжување.
Нас ни е важно да бидат опфатени сите објекти за домување. Ние имаме своја технологија по која го следиме процесот и ќе знаеме дали и кога точно ќе го завршиме процесот. Согласно сегашните процеси, очекуваме и уверени сме дека ќе завршиме во законскиот рок, изјави Симовски за МИА.
Од Државниот завод за статистика информираат дека со сиот расположлив потенцијал се работи непрекинато и според утврдените рокови предвидени во Законот за попис.
Освен во своите домови, граѓаните можат да се попишат и на одредени пунктови во нивните општини, што ги отвори Државниот завод за статистика. Локациите за попишување се достапни на линкот на ДЗС: https://popis2021.stat.gov.mk/
Од ДЗС велат дека во последните денови од Пописот се одвиваат непречено и со зголемен интензитет во одредени пописни реони. Помалите пописни реони низ државата веќе завршуваат со попишување на населението и се прават последни завршни проверки. Во одредени урбани средини интензитетот на попишување се зголемува, се вклучуваат дополнителни попишувачи за да може да се посети секое домаќинство и никој да не биде пропуштен.
Пописот на населението, домаќинствата и становите во Република Северна Македонија, кој официјално започна на 5 септември, согласно Законот за попис ќе трае до денеска 30 септември.