Денеска во 10 часот во Кривичниот суд треба да започне првото рочиште за случајот „Таргет-Тврдина“ на Специјалното јавно обвинителство кој треба да докаже кој и како го вршел нелегалното прислушување.
Минатата година во ноември, од СЈО објавувајќи ја новата истрага за овој случај рекоа дека постои основано сомнение за 10 лица вработени во УБК кои преку злоупотреба на системите за следење на комуникациите незаконски прислушувале и ги повредиле основните човекови права и слободи на граѓаните.
Според истрагата, незаконски прислушувани од 2008 го 2015 година, незаконски биле прислушувани најмалку 5.827 телефонски броеви.
Прислушувањето се вршело преку три системи.
„Прибавените докази покажуваат дека преку првиот систем за следење од 01. 01. 2008 до 30. 11. 2008 без судска наредба биле следени најмалку 229 телефонски броеви и уште најмалку 21 телефонски број надвор од периодот на судските наредби. Преку вториот систем за следење , во периодот од 11.2. 2008 до 02.01. 2015 без судска наредба е следена комуникацијата на најмалку 3.646 телефонски броеви и дополнително уште најмалку 1.268 телефонски броеви надвор од периодот од судска наредба. Третиот систем бил во употреба од 21. 01. 2015 до 31. 12. 2015 без судска наредба се следени најмалку 401 телефонски број и дополнително уште најмалку 252 телефонски броеви надвор од судската наредба“, објавија од СЈО минатата година.
Осомничените издавале наредби, внесувале броеви и слушале разговори.
Обвинителката Фетаи рече дека уништувањето на двата системи за следење комуникации го успорило времето на прибирање на доказите, а за уништување на овие докази е отворена истражната постапка под името „Тврдина“. Во случаите „Таргет“ и „Тврдина“, кои се споени во еден обвинителен акт, првообвинети се поранешниот директор на Управата за безбедност и контраразузнвање (УБК), Сашо Мијалков, поранешниот шеф на кабинетот на Мијалков, Тони Јакимовски, и уште десетина лица.
Обвинети во случајот се и началниците од УБК, Горан Грујовски и Никола Бошковски, кои избегаа во Грција и се наоѓаат во екстрадиционен притвор во Солун, откако на 18 октомври беа уапсени на солунскиот аеродром.
Специјалното јавно обвинителство во истражната постапка утврди дека лидерот на ВМРО-ДПМНЕ, Никола Груевски (во тоа време премиер) не бил таргет, а го има единствено во разговорите со другите луѓе кои биле следени.