Денеска продолжува конститутивната седница за избор на претседател, заменик на претседателот, членови и нивни заменици на Комисијата за прашања на изборите и именувањата. Продолжението на седницата е закажано за денеска во 12 часот.
На дневен ред на седницата е и изборот на претседател на Собранието на Република Македонија.
Во текот на вчерашниот ден седницата беше во знакот на пратениците од ВМРО-ДПМНЕ, кои постојано се јавуваа за збор, како и за реплики на говорите на нивните пратеници.
Прв зборуваше пратеникот Антонио Милошоски по што за реплика се јавија многумина пратеници од неговата партија. Оливер Спасовски од СДСМ процедурално реагираше дека на тој начин се врши опструкција на седницата. Претседавачот со седницата Трајко Вељаноски рече дека деловникот забранува реплики и контрареплики меѓу членови на иста пратеничка група, но оти со оглед на тоа што пратенички групи се уште не се формирани, пратениците имаат право на реплики и контрареплики.
Милошоски на говорницата рече дека кандидатот за претседател треба да биде од ВМРО-ДПМНЕ бидејќи таа е победничка партија,а ќе било и во согласност со практиката во некои европски држави каде што претседателот на собранието не мора да е од владејачката коалиција.
Тој побара од Комисија што треба да биде формирана, да го процени и моралниот и политички кредибилитет на идниот претседател кој не треба да биде човек што не ја отфрлил тиранската платформа и не смее да биде аболициран криминалец. Собраниската седница од галеријата ја следат и странски амбасадори.