Денеска на пладне, граѓаните од целиот Југоисток и пошироко се собираат на Протестен Марш каде уште еднаш сите заедно во еден глас ќе кажат дека во Македонија место за рудници со отворен коп нема.
Оваа реакција на граѓаните доаѓа по неколку месеци молк од владата која што во екот на кампањата за локалните избори вети дека рудниците нема да се градат, а досега не е преземен ниту еден чекор за нивно запирање.
Активистите од Валандово веќе некое време на социјалната мрежа „Фејсбук“ објавуваат фотографии од забрзаната изградба на рудникот Казандол. Тие велат дека се чувствуваат разочарано и предадено затоа што Владата се уште не направила ништо за да запре изградбата на овој рудник.
Активистите од Валандово пред еден месец објавија фотографии. На нив може да се види фолијата којашто наводно треба да спречи продор на отровите и тешките метали во почвата и водата. Раководството на рудникот „Казандол“ ова го најавуваше помпезно и како голема гаранција дека жителите нема потреба да стравуваат дека нивното здравје и природата ќе бидат засегнати. На фотографиите се гледа дека фолијата има големи дупки и засекотини и не оддава впечаток на безбеден метод за заштита од продорот на отровите во почвата и водата.
Шест нешта за рудникот во Казандол за кои сите мора да знаеме
Концесионер на рудникот за бакар и бакарни производи во Казандол е компанијата Сардич МЦ. Основач на „Сардич МЦ“ е акционерското друштво „Коппер Инвестмент“. За оваа инвестиција Груевски зборува уште на почетокот на 2013 година. Инвестицијата прво ја нарекуваше „англиска“, продолжи со „англиско-украинска“ за конечно да стаса до само „украинска“. Во реалноста – со удели на македонските големостопанственици и политичари од двете држави. Повеќе за оваа страна на приказната во текст на Сашка Цветковска на линкот подолу.
Шест нешта за рудникот во Казандол за кои сите мора да знаеме
Пред две недели и градоначалникот на Валандово Перо Костадинов предупреди и ја повика Владата да ја преиспита концесијата што и е доделена на компанијата „Сардич“.
Костадинов на прес-конференција кажа дека постојат неправилности околу одржувањето на јавната расправа, но и дека во општината постојат паралелни документи, едни – со позитивно мислење кои градоначалникот ги испраќал до надлежните министерства и втори со различен став направени за да им се покажуваат на жителите на Валандово.
ПО ПРОТЕСТОТ НОВА ТВ ЌЕ ОБЈАВИ ПОГОЛЕМА СТОРИЈА ЗА РУДНИКОТ КАЗАНДОЛ И КАКО КОМПАНИЈАТА ЈА ДОБИЛА КОНЕСИЈАТА ЗА ИСКОП.