По заедничката литургија во Србија, поглаварот на СПЦ Порфириј вчера попладнето пристигна во Скопје со делегација од осум владици. Денеска со поглаварот на МПЦ г.г. Стефан ќе служат заедничка литургија по повод 24 мај, денот на сесловенските просветлители Кирил и Методиј.

Сметавме дека е прилично Соборниот Храм да светне во најдоброто светло што можеме да го овозможиме за овој историски момент за сите нас“, изјави вчера пред литургијата, отец Бобан Митевски.

По литургијата се очекува двајцата поглавари да имаат говори.

„Самата литургија значи заедништво, значи една уста и едно срце кои го слават Господ, без ниедна разлика и надминување на сите разлики кои не разделуваа“, изјави црковниот претставник пред денешниот голем ден.

Денешната заедничка литургија во Скопје е продолжение на затоплувањето на односите меѓу двете цркви кое почна со заедничката литургија во четвртокот во храмот Св. Сава во Белград. Двете земји и двата црковни народи оваа литургија ја означија како историски чин, со кој се потврди надминувањето на 55-годишниот раскол меѓу СПЦ и МПЦ-ОА и обновувањето на канонското и евхаристиското општење.

Очекувањата во Скопје се дека наскоро СПЦ ќе достави барање до Вселенската Патријаршија за автокефалност на МПЦ-ОА.

Вселенската патријаршија на 9-ти мај ја призна за канонска МПЦ – ОА. Во меѓувреме грчките медиуми вчера пренесоа изјава од Вселенскиот патријарх Вартоломеј. Тој, нагласувајќи ја историската одлука на Синодот за враќање на Охридската архиепископија во евхаристиска заедница, што го отвори патот за помирување со СПЦ и намалувањето на противреченостите на Балканот, навел дека сослужувањето на српскиот патријарх Порфириј и архиепископот охридски Стефан со право може да се оцени како чин на помирување и соработка.