Растечкиот тренд на користење производи за нега на кожата од страна на осумгодишни деца може да доведе до трајни проблеми со кожата, предупреди Британското здружение на дерматолози.
Некои деца бараат од родителите да им купат луксузни козметички производи откако ќе видат дека ги користат нивните омилени инфлуенсери на платформи како YouTube и TikTok. Но, многу од овие производи содржат штетни активни состојки наменети само за возрасни, како што се киселините за пилинг кои можат да предизвикаат алергии или егзема.
Осумгодишната Сејди првпат видела видеа за нега на кожата на TikTok, каде што слушнала од инфлуенсерите „колку се добри на кожата“.
Таа беше особено примамена од производ од компанијата Bubble, кој „кога ќе го притиснете надолу, излегува во [облик на] цвет“, и американскиот бренд Drunk Elephant затоа што „и се допаднала амбалажата“. Брендот продава разни производи, од балсами за усни до хидратантни креми.
Со својата шарена амбалажа и логото како од цртан филм, Drunk Elephant е еден од брендовите кои најчесто се појавуваат во онлајн содржините за нега на кожа на возрасни и деца.
Содржините за нега на кожата се неограничени на социјалните мрежи и многу дневни рутински видеа привлекуваат милиони прегледи.
Вработените во Sephora и Ulta со седиште во САД велат дека децата често ги злоупотребуваат тестерите во продавниците и ги чистат полиците со производи веднаш штом ќе дојдат на залиха.
Конкретно Drunk Elephant стана толку популaрен што ја примора основачката Тифани Мастерсон да им каже на „децата и младите да се држат настрана од нивните помоќни производи кои вклучуваат киселини и ретиноли. На нивната кожа сè уште не и се потребни овие состојки“, вели таа.
Детскиот дерматолог д-р Тес Мекферсон вели дека е важно децата да добиваат „информации, а не дезинформации“ за нега на кожата.
„Голем дел од производитес се против стареење. Можеби се погодни за постара кожа – не се погодни за деца. Можат да предизвикаат иритација на кожата на која возраст и да сте – но за помладата кожа, тие можат да бидат потенцијално опасни или проблематични. За дете со егзема или чувствителна кожа, тие би можеле да предизвикаат значителни проблеми.
Подготви: Марта Пешевска
Извор: Би-Би-Си