Околу 30 лица загинаа, а шеесетина се повредени во еден од најголемите терористички напади што денеска се случи во Багдад, пренесува Бгнес, повикувајќи се на телевизијата Ал Арабија.
Првично беше објавено дека експлозивна направа експлодирала на полн пазар во претежно шиитското предградие Мадинат Садр. Во тоа време имало особено многу луѓе, бидејќи многу Ирачани и цели семејства со деца биле на пазарот за да купат сè што е потребно еден ден пред големиот муслимански празник Курбан Бајрам.
Експлозијата предизвика значителна материјална штета, неколку продавници се запалиле, а луѓето во паника се обидувале да избегаат по тесните ходници меѓу трговските центри далеку од местото каде што експлодира бомбата. Безбедносните сили на Багдад потврдија дека во нападот била употребена импровизирана експлозивна направа.
Ирачкиот премиер Мустафа ал Казими нареди итна истрага за сите околности на инцидентот. Покрај тоа, командирот на една од единиците на федералната полиција во Мадинат Садр бил уапсен во врска со инцидентот.
По терористичкиот напад, за кој сè уште ниту една група не презеде одговорност, безбедносните мерки се сериозно засилени во централните и јужните провинции на земјата, каде што живеат претежно шиити. И на улиците има дополнителни мобилни патроли и сите превозно средства што пристигнуваат внимателно се следат.