Претседателот на ВМРО ДПМНЕ Христијан Мицкоски денеска на прес-конференција рече дека министерката за правда „ги минира преговорите“ за Законот за Јавно обвинителство и дека таа е пречката поради која нема компомис.
„Јас навистина жалам што министерката за правда на моменти се претвора во министер за неправда и човек толку полн со омраза и гнев кон ВМРО-ДПМНЕ и опозицијата јас не сум сретнал досега дури и да бил тоа висок претставник или активист од редовите на СДСМ, што во секој поглед гледа да ги минира преговорите, конкретно за законот за јавно обвинителство и практично таа е основната пречка што можеби досега тие преговори не завршија“ рече Мицкоски.
Тој не зборуваше конкретно за барањата на опозицијата за Законот за Јавно обвинителство и само рече дека „позицијата на ВМРО ДПМНЕ се темели на правото“.
„Тој што се огрешил пред законите и се посрамотил пред граѓаните треба да сноси одговорност низ еден фер, транспарентен судски процес за да има можност да се докажува дали е виновен или невин. И на крајот од тој судски процес ќе има конечна одлука. Додека пак нејзината позиција е исклучиво политичка со една цел пресметка со ВМРО-ДПМНЕ. Во такви услови ние не можеме да ги доближиме ставовите. Ние мора да најдеме правно решение за правен проблем“ рече Мицкоски.
На прес конфренцијата реагираше министерката за правда Десковска која на фејсбук напиша дека Мицкоски има „искривена перцепција за реалноста и не е свесен кои се црвените линии за правда и владеење на правото чие почитување го бараат граѓаните, но и меѓународната заедница“. Таа му порача на Мицкоски да си погледне во сопствениот двор и да се запраша какви позиции застапува неговата партија во разговорите за законот.
„Неговата денешна изјава е крик на немоќ, крик на фрустрација дека вистинската намера на нивните позиции во однос на Законот за јавно обвинителство е разобличена и дека барања за заштита на криминалот и амнестија на криминалците нема да поминат.
Се додека истакнуваат барања кои значат рушење на правната држава и амнестија за криминалот – тие барања нема да поминат. И тоа не е само мој став. Тоа е став и на СДСМ, тоа е став и на нашите граѓани. Јас тој став, како министер за правда го застапувам досега и ќе продолжам да го застапувам и понатаму“ напиша Дексовска.
Десковска му порача на Мицкоски и да размисли дали ќе биде лидер или марионета кој ги исполнува „интересите на лидерот зад сцената“ .
ВМРО ДПМНЕ бара тие да предложат шеф на Обвинителството за организиран криминал
ВМРО ДПМНЕ бара мандатот на сите обвинителите на СЈО да заврши со смената на Јанева