Министерката за образование и наука, Рената Дескоска, најави ревизија на учебниците на сите нивоа на образование, на што ќе работат експерти и комисии и секоја содржина за која ќе се утврди дека е погрешна, односно дека поттикнува говор на омраза или дискриминација, ќе биде отстранета.
По средбата со Студентскиот пленум во просториите на МОН, Дескоска рече дека ваква реформа најавила уште на првиот ден од мандатот, за наставните програми и учебници по сите предмети.
– Ревизијата на сите учебници ќе биде дел од еден процес што ќе биде дебатиран на експертско ниво. Јас во моментов во Министерството имам добиено преставка од Народниот правобранител за учебник по општество којшто содржи дискриминаторски одредби. Со оглед на тоа што јавноста честопати беше соочена со примери на учебници во коишто имаме погрешни констатации, каде што има говор на омраза, каде што има дискриминаторски ставови и предрасуди значи сите учебници ќе бидат отворени на процес на ревизија во целокупното образование со цел да се отстранат грешките коишто учениците ги учат, посочи министерката.
Таа е децидна дека не смее да се дозволи учениците да учат од погрешни учебници или учебници што ги учат на предрасуди, дискриминација, со говор на омраза и слично, и дека за ова треба да се направи сериозна реформа.
Таа додаде дека од Друштвото на писатели е пристигнат и иницијатива за ревидирање на списокот на лектири и смета дека тоа треба да се направи во рамки на процесот на ревидирање на учебниците.
Воедно таа информираше дека проектот за бесплатни учебници ќе продолжи, бидејќи основното и средното образование е задолжително.