Сите пораки кои ги добиваме од ЕУ се дека СЈО треба да продолжи да работи како посебно Обвинителство, а не да се претопи во друго Обвинителство кажа министерската за правда Рената Дескоска пред денешната средба со претставници на ВМРО ДПМНЕ кои поднесоа 65 амандмани на Законот за јавно обвинителство.
ВМРО ДПМНЕ бара СЈО да стане дел од Обвинителството за борба против организиран криминал и корупција и да запрат истрагите кои се покренати 18 месеци по формирањето на СЈО.
-И денешното укажување од амбасадорот Жбогар е во таа насока дека на позитивна оценка од Брисел може да се надеваме само ако СЈО остане посебно обвинителство со траен мандат и со конкретни надлежности. Ова ќе биде услов за отворање на преговори со ЕУ. Не може да се прифати Закон кој ќе штити лични интереси, законот мора да има стандарди и тоа црвената линија од која не отстапуваме, кажа Дескоска на прес конференцијата во Собранието.
Дескоска исто така напомена дека не е прифатлив ниту амандманот на ВМРО ДПМНЕ со кој бараат да запрат сите истраги кои биле покренати 18 месеци по формирањето на СЈО.
Според Дескоска за Законот за јавното обвинителство ќе се гласа кога ќе се обезбеди двотретинско мнозинство.
-Ставот на Владата е за Законот да се гласа веднаш кога ќе имаме усогласен законски текст кој ќе се испрати до Собранието, рече Дескоска која не сакаше да ја коментира изјавата на Претседателот на Собранието Талат Џафери кој на утринскиот брифинг со новинарите напомена дека за СЈО ќе се гласа по изборите.
Дескоска и премиерот Заев во Собранието имаа средби со претставници на Алијасната на Албанците и Беса за подршка за Законот за јавно обвинителство.
Села кажа дека СЈО треба да продолжи автономно со работа и бараат да се интервенира во Законот во однос на роковите за покренување на истраги. СЈО не ја исполни целта затоа што досега има казна само за претставник на албанска опозиција, рече Села.
-Кога зборуваме за изборен криминал, се знае кој краде избори веќе 17 години. Тоа се оние кои и сега се во власта. Алијансата предлага и да се формира и специјално судство по примерот на Украина кое ќе суди за случаите на СЈО. За да не се дозволи политички партии да ги партизираат судовите, со закон да се санкционира секој функционер кој ја злоупотребил службената должност да не може да биде член на Советот на обвинители и да биде избран за судија. Нема логика да зборуваме за деполитизација на судскиот систем, а да инсталираме бивши функционери во Советот на обвинители кои потоа ќе ги избираат новите обвинители, рече Села.
Шефот на Делегацијата на Европската Унија во земјава Самуел Жбогар денеска изјави дека е од огромна важност СЈО да продолжи со гонењето на оние кои се одговорни, на сторителите, и тоа да го прави на професионален начин и независно.
–Се сеќаваме дека СЈО беше воспоставено од главните политички партии преку Договорот од Пржино, со цел да се обезбеди превземање одговорност за нелегалните пресретнувања на комуникациите, како и за содржината на истите, вели Жбогар во пишаната изјава.
Европската Унија, како што посочува тој, ги следи одблиску подготовките за измена на Законот за јавно обвинителство, кои имаат за цел да го вклучат функционирањето на СЈО како составен дел од Јавното обвинителство.
-Ги поттикнуваме сите парламентарни политички партии и почитувани членови на Собранието позитивно да го земат во предвид усвојувањето на законот. Ова ќе им ја покаже на граѓаните, како и на меѓународната заедница, посветеноста за утврдување одговорност за сите кривични дела, особено за корупцијата на високо ниво и злоупотреба на моќ, но и за зајакнување на владеењето на правото во Република Северна Македонија. Исто така, ќе придонесе кон исполнување на желбата на граѓаните за фер општество, засновано на правила, што всушност е суштината на процесот на проширување на Европската Унија, истакнува Жбогар во изјавата во врска со измените на Законот за јавно обвинителство.