„ВМРО ДПМНЕ бара целосно демонтирање на СЈО и на Обвинителството за борба организиран криминал, затоа што не се согласува сите обвинители и вработени во СЈО да преминат во Обвинителството за борба организиран криминал, ниту ова Обвинителство да продолжи со истрагите од прислушуваните разговори“ рече министерката за правда Рената Дескоска по средбата со преставници на ВМРО ДПМНЕ околу новиот Закон за јавно обвинителство.
Доколку се прифатат барањата на опозицијата, многу истраги и предмети на СЈО ќе застарат.
„ Според барањето на ВМРО ДПМНЕ неизвесна треба да биде судбината на сите лица кои се вработени во СЈО, лица кои се вработени на неопределно работно време во СЈО и во Обвинителството за борба против организираниот криминал, да не се знае каде ќе одат што негативно ќе се одрази на континуитот на процесите затоа што процесот на екипирање оди споро, а тоа ќе доведе до застарување на предметите и слуачите“ рече Дескоска.
Друга клучна разлика е што бараат во новиот закон да се избрише одредбата со која се дава надлежност на Обвинителството за борба против организиран криминал да работи по предметите од прислушуваните разговори и ова обвинителство да не води истраги за изборни фалисфикати, за предмети поврзани со злоупотреба на јавни набавки и злоупотреба на ИПА фондови.
Антонио Милошоски кој е преговарач од ВМРО ДПМНЕ потврди дека за нив не е прифатливо сите обвинители од СЈО да преминат на работа во Обвинителството за борба против организираниот криминал.
„Не се согласуваме обвинителката Катица Јанева и другите обвинители по сила на закон да преминат во обвинителството за борба против организиран криминал, затоа што се сомневаме дека може да се вклучени во случајот Рекет“ рече Милошоски.
Тие бараат и нов обвинител да раководи со Обвинителството за организиран криминал, а не Вилма Рускоска која „за неподобните политички лица се однесува како обвинител, а кога станува збор за Катица или некојси Кики и Фрики се однесува како нивни адвокат“.
„Ова обвинителство не се труди во случајот „Рекет“ да открие повеќе докази, туку со одолговлекувањето, со изгубените телефони и годишните одмори како да се труди да сокрие повеќе докази за овој мегаскандал. Сметаме дека тоа во моментов се појавува како пречка за продуктивноста на разговорите за Законот за ЈО“ рече Милошоски.
Барањето за смена на Рускоска е изненадување за власта и го толкуваат како обид на опозицијата да се одолговлекува целиот процес.
„ВМРО ДПМНЕ со амандманите што ги поднесе на владиниот предлог закон за Јавно обвинителство побара СЈО да се интегрира во Обвинителството за организиран криминал но не бараше прекин на мандатот на обвинителот кој раководи со ова Обвинителство. Кога ние им излеговме во пресрет и прифативме СЈО да стане дел од Обвинителството за борба против организиран криминал , тие сега се противат на сопствениот предлог и не го прифаќаат ова решение додека не се смени Рускоска.
Имам чувство дека кога ние ќе се обидеме да се доближиме до нивните ставови, тие се повлекуваат“ рече министерката Дескоска.
За случајот „Рекет“ Дескоска кажа дека бил шок за сите и дека секој кој е вклучен во криминал треба да одговора – без разлика дали е близок до власта, опозицијата или обвинителството.
ВМРО ДПМНЕ побарале и Обвинителот кој ќе биде на чело на Обвинителството за борба против организиран криминал и корупција да се избира од Советот на јавни обвинители но по предлог на собраниската комисија за избори и именувања. Исто така предложиле и со завршувањето на мандатот на републичкиот јавен обвинител да прекине мандатот и на 27 обвинители кои раководат со други обвинителства – што за власта занчи централизација и парализирање на целиот систем.