Дрска кражба се случила викендот во мултимедијалниот културен центар „Матица ексклузив“ во централното градско подрачје. Мета, покрај објектот, биле и 16 уметнички дела на познатиот уметник Павле Кузмановски по два дена од отворената изложба на слики.

Шест слики, како што изјавија соговорниците на НоваТВ, биле изнесени во ноќта во петокот кон сабота и како тоа да не било доволно на провалниците, па наредната ноќ се вратиле по уште 10 и едноставно ги „соголеле“ ѕидовите на „Матица Ексклузив“.

Немилиот настан го забележал еден од соседите на мултимедијалниот културен центар и веднаш алармирал кај сопственикот Раде Силјан.

„Промоцијата се случи и сè мина во најдобар ред. Откако завршивме, заклучивме и заминавме. Доцна вечерта сосед му се јавил на Раде Силјан и му кажал оти забележал дека вратата е скршена вратата. Констатиравме дека недостасуваат шест слики. Она што е интересно е дека во ноќта на сабота кон недела земале уште 10 слики. Тоа се дела што се застапни во монографијата „Урбани пејзажи создадени во последните 60 години“, ни изјави Павле Кузмановски.

Додека разговаравме со Кузмановски, на лице место имаше припадници на полицијата кои го истражуваат случајот.

„Се чекаат и инспектори. Има сигурносни камери и во објектот, и од спротива, и во „Македонска лотарија“. Но, искрено не верувам дека делата ќе бидат најдени и ќе се вратат. Вредноста на делата е релативна, кои како ги толкува. За мене се бесценети оти меѓу нив имав дела од детството, од уметничката школа, од Белград, од Академија, од Париз, пастели, дела од Тетово, од Охрид. Ако треба да се каже цена, таа би била меѓу 10 и 15.000 евра“, додаде Кузмановски за НоваТВ.

Изненаден од кражбата во „Матица ексклузив“ е сопственикот Раде Силјан кој се надева дека сторителите ќе бидат најдени и изведени пред лицето на правдата, а делата вратени онаму каде што припаѓаат.

„Во саботата доцна вечерта бев во Катланово кога се јави соседот и ми кажа дека вратата во Центарот е разбиена. Во неделата наутро, околу 03:15 часот, иста слика. Во двата наврата се одземени вкупно 16 слики, шест во саботата и уште 10 во неделата. Ќе чекаме резултати од истрагата и се надеваме дека сторителите ќе бидат најдени и казнети и сликите вратени“, вели Силјан.       

С.Д.