По зголемениот број на хоспитализирани деца во гевгелиската болница каде и педијатри од Скопје од денес изутрина утврдуваат која е причината за појава на респираторни симптоми кај 50 деца, кои се негативни на ковид-19, лекарите од Институтот за белодробни заболувања кај децата во Козле за НоваТВ изјавуваат дека и таму имаат невообичаено висок број на прегледи и приеми на најмалите пациенти за овој период од годината. Во мај во оваа болница имало 533 амбулантски преглед и 128 хоспитализирани деца, а во месец јуни дури 1472 амбулантски прегледи и 193 хоспитализации.
Лекарскиот колегиум од Инстутутот во Козле оценува дека со враќање на животот во нормала, општеството го плаќа данокот во форма на потешки вирусни и бактериски инфекции од вообичаено, нешто со што можеби и ќе се соочиме во следните две години.
– Во последните два месеци, со падот на бројот на заболени пациенти од ковид-19, нашата институција, како и болниците ширум светот, се соочуваат со посилен бран на инфекции предизвикани од други респираторни патогени. Овој феномен научната јавност го нарекува “данок на имунитетот” и истиот донекаде ѝ беше очекуван и се должи на малата експозиција на други респираторни патогени за време на пандемијата и неможноста да се создаде имунитет за вируси и бактерии којшто се јавува при одржување на нормални социјални контакти. Најголемиот процент од хоспитализираните деца во мај и јуни се доенчиња во првите неколку месеци од животот. Се соочуваме со инфекции кои не се вообичаени за овој период на годината – велат лекарите од Институтот во Козле.
Антителата за вирусот мајките најверојатно не ги пренеле во бременоста
Тие појаснуваат дека „респираторниот синцициелен вирус кој најчесто прави компликации и долнореспираторни инфекции кај доенчиња и мали деца, најверојатно се должи и на неекспонирањето на мајките во тек на бременоста, а тие се оние кои би требало да ги пренесат антителата за вирусот, но само во случај кога би имале скора експозиција на истиот.
– Исто така, детектираме и аденовирусни инфекции, ентеровируси, како и Рота вирусни инфекции. Од бактериските инфекции доминираат стрептоконите инфекции кои предизвикуваат и горно и долно респираторни проблеми, како и инфекции со грам негативни бактерии – Клебсиела, Псеудомонас, Ешерихиа коли, Мораксела катаралис – вели Лекарскиот колегиум од оваа институција во својот став.
Лекарите од Козле додаваат и дека секое дете пред хоспитализација во Институтот, заедно со придружникот, се тестира за ковид-19. – Досега имавме едно доенче и мајка позитивни на вирусот, со лесна клиничка слика. Поради големиот прилив на пациенти, се соочуваме со недостиг на болнички места и таму каде што дозволува состојбата, децата ги следиме амбулантски. И покрај тоа , сите деца кои во овие месеци побараа амбулантски и болнички третман, беа навремено и успешно излекувани, без компликации“ – порачуваат од Институтот.
Во Гевгелија се трага по вирус, мутација на вирус или вид на паразит
И според изјавите и на директорката на Универзитетската клиника за детски болести и фебрилни состојби од Скопје, д-р Аспазија Софијанова, и во други градови е зголемен број на деца со респираторни симптоми. Таа, заедно со уште две докторки од Клиниката, пристигнале утринава во Општата болница во Гевгелија за да направат дополнителни испитувања и да им дадат поддршка на колегите педијатри. Првичните резултати од анализите се очекуваат вечерва.
– Не само во овој регион, туку и во други градови има зголемен број на деца со горнореспираторна симптоматологија. Доаѓаме со комплетна опрема за да земеме цел респираторен панел и точно да утврдиме дали се работи за вирус, мутација на вирус или некој вид на паразит, но тоа ќе го знаеме откако ќе направиме увид во клиничката слика на дечињата, во дијагностиката што ја носиме со нас и дијагностиката што вчера ја направиле колегите од Гевгелија – изјави д-р Софијанова.
Љубица Балабан