Осумгодишниот Павел кој е со тешка попреченост и е делумно подвижен од денеска ќе биде сместен во одделот за специјализирано живеење во заедница во Неготино.
Со него ќе бидат сместени уште две деца од 10 и 16 годишна возраст кои се со тешка попреченост во психомоторниот развој и не се подвижни.
Доаѓаат од Специјалниот завод во Демир Капија и отсега ќе живат во похумани услови во заедницата.
Ќе имаат 24 часовна нега од тим на социјални работници, едукатори и физиотерапевт.
Овој Центар започнува со работа од денеска, а таму денеска е и министерката за труд и социјална политика Мила Царовска.
Центарот е дел од проектот за деинституционализација на штитениците од Домот во Демир Капија каде има вкупно 216 лица, проект со кој е предвидено за две до три години сите тие да бидат ресоцијализирани и вклучени во општеството, а не во големи, безлични и сегрегирачки институции. Тој е поддржан од УНИЦЕФ, УНДП и од Европската Унија.
Во Демир Капија може да остане само еден медицински дел за најтешките случаи.
Попладне предвидено е Царовска да има средба со жителите на село Тимјаник, кои за денеска закажаа протест против ваквата одлука на Министерството.
Министерката Царовска по овие најави вели дека изненадена и искрено разочарана од реакциите.
-Овие деца, од кои за жал повеќето се неподвижни, се преместуваат како би имале похумани услови за живот и семејна атмосфера. Жално е што се уште постојат толку предрасуди, но токму против ваквите размислувања силно се бориме. Сакам да им порачам на сите кои се плашат или се загрижени дека нема никаква потреба за тоа. Децата во домот не се никаква опасност за нив или нивните деца, ќе бидат под 24 часовна грижа и нема да им го нарушуваат животот. Се надевам дека ќе преовлада разумот и дека на крајот ќе имаме успешен процес на преселба на децата од институциите во малите домови, напиша Царовска.