Автобусите на ЈСП Скопје секојдневно, пред и по пуштањето во системот на превоз, се предмет на целосна дезинфекција. Мерката како дополнителна, покрај вообичаеното одржување на хигиена, пред неколку дена ја најавија и од ЈСП Скопје во насока на заштита на здравјето на корисниците на јавниот превоз, пред се поради опасноста од ширење на коронавирусот во земјава.
Фотографии од процесот на дезинфекција во возилата на ЈСП сподели и скопскиот градоначалник, Петре Шилегов на својот Фејсбук профил.
„Апелираме на смиреност и почитување на препораките на надлежните државни институции, како и на одговорно однесување кон колективното здравје, на секој од нас поединечно“, напиша Шилегов по утринската дезинфекција на автобусите пред нивно ставање во функција во денот.