Претседателот на Собранието, Талат Џафери очекува во наредните денови да се најде решение за амандманите поднесени од опозициската ВМРО-ДПМНЕ за Законот за употреба на јазиците.
-Комуницирам со претставници на пратеничките групи вклучувајќи ја и ВМРО-ДПМНЕ. Мислам дека сме блиску до решение, рече Џафери на денешната средба со новинарите во Собранието.
Целта, како што рече, е да се избегне блокада на Собранието. Процедурално, како што кажа, тој нема да дозволи да се случи блокада во законодавниот дом.
Двата закона со кои се предвидува намалување на надоместокот за патните трошоци, пак, ќе почекаат откочување на законот за јазиците бидејќи се на истата седница.
За Законот за јазиците станало збор и на средбите со тројцата европратеници Иво Вајгл, Кнут Флекенштајн и Едуард Кукан, кои се иницијатори на разговорите во рамки на Жан Моне процесот.
Конкретно за овој процес, тој очекува да продолжи на 15 март, но има шанси тоа да се случи и во мај.
– Со претставниците на Европската комисија и Европскиот парламент, што беа овде, се договоривме процесот да продолжи на 15 март и треба да се одржи во Македонија. Алтернативно, доколку не може да се обезбеди присуство на експертите, високите претставници од европските институции и Јоханес Хан, има шанси процесот да се одложи за во мај, вели Џафери.Џафери посочи дека политичките партии на овој процес ќе разговараат за собранискиот деловник, бидејќи се констатирале бројни недостатоци во него.
– Констатирано е нецелосно толкување на деловникот, да не кажам злоупотреба, за времетраење на седниците. Ќе се разговара за етичкиот кодекс кој се однесува на поведението на пратениците, кои се должностите и одговорноста и нивните релации со јавноста, рече Џафери.