Претседателот на Собранието Талат Џафери на брифинг со новинарите изјави дека нема да се потпише на указот за прогласување на Законот за јазици наместо шефот на државата.
„Нема да ставам потпис на друго име“, рече Џафери. А на прашањето дали може указот да се објави во Службен весник само со негов потписи, Џафери одговори „да видиме што ќе каже демократијата“.
Според собранискиот спикер, во оваа фаза нема рокови до кога указот на Законот може да биде потпишан и објавен. Решението најверојатно нема да биде донесено во брзо време, бидејќи “нема потреба од дополнителни тензии“, вели тој.
Претседателот Иванов има уставна должност да го потпише указот и доколку тоа не го стори, ќе треба да следува импичмент. За оваа процедура потребно е двотретинско мнозинство, кое парламентарното мнозинство го нема.
-Парламентарното мнозинство не може да го исполни ова. Но, има други правни процедури и други одговорности. Има кривична одговорност според членот 335 за непочитување на службената должност, вели Џафери.
Собранието нема да иницира постапка до Уставниот суд, за да се утврдува улогата на шефот на државата за Законот за јазици, зашто нема конфликт на надлежности. Сепак, Џафери напоменува дека Собранието не може да се доведе во ситуација да се плаши да носи закони и да се прашува дали Претседателот ќе ги потпише или не – тоа ќе биде најлошата варијанта оценува спикерот. Не може ниту една институција да го запре Собранието да носи закони – вели тој.
Тој побарал и средба со шефот на државата, но не добил одговор.
-Побарав средба со Иванов, но не добив одговор. Изгледа бил зафатен. Потоа јас заминав на пат, рече тој.
По одлуката на Врховниот суд да го укине затворскиот притвор на пратениците од ВМРО ДПМНЕ, Џафери очекува тие да се вратат во работата на Собранието. Неучеството на опозицијата во Собранието беше условено со притворот на пратениците – тој аргумент сега е елиминиран и треба да се вратат вели Џафери.
Од шесте пратеници на ВМРО ДПМНЕ, тројца можат да се вратат во Собранието. За пратеничката Жаклина Пешевска Обвинителството ја запре постапката, а за Јохан Тарчуловски и Љупчо Димовски е укинат куќниот притвор.
Денеска во Собранието се поставуваат пратенички прашања – пратениците на ВМРО ДПМНЕ не се во салата.