Додека трае паузата во законодавниот дом што ја побара заменик координаторката на пратеничката група на ВМРО-ДПМНЕ, Дафина Стојановска, да потсетиме на изјавата што на почетокот на седницата ја даде претседателот на Собранието, Талат Џафери.
Откако пратеникот и координатор на ВМРО-ДПМНЕ, Никола Мицевски и неговата сопартијка, пратеничката, Ангелика Петкова, пред почетокот на седницата влегоа во посебно изолирани кабини во собранието, спикерот Џафери во нему познат стил рече:
– Се надевам дека нема да има кривична пријава за биолошки тероризам овој пат. Веројатно сите сме свесни што зборував пред година и пол за потребата од онлајн работа“, порача собранискиот спикер Талат Џафери.
Џафери со ова потсети на минатогодишната ситуација кога ВМРО-ДПМНЕ и Левица поднесоа кривични пријави за непостапување според здравствените прописи против Џафери и двајцата заболени од корона пратеници на СДСМ и ДОМ Бисера Костадиновска-Стојчевска и Мирослав Богдановски,кои гласаа изолирани во кабините направени крај салата за пленарни седници исто така облечени во скафандери и спроведени до кабините со истите безбедносно-здравствени протоколи како сега Мицевски и Петкова.